तुळजापूर (प्रतिनिधी)- तुळजापूर तीर्थक्षेत्रातील वाहतूक कोंडीची समस्या दिवसेंदिवस गंभीर होत चालली आहे. महाविकास आघाडीच्या काळात तत्कालीन मुख्यमंत्री विलासराव देशमुख यांच्या संकल्पनेतून तुळजापूर विकास आराखडा साकार करण्यात आला. भविष्यातील वाढती वाहनसंख्या लक्षात घेऊन शहरातील प्रमुख चौकांमध्ये लाखो रुपये खर्चून सिग्नल यंत्रणा उभारण्यात आली होती.
मात्र, प्रत्यक्षात ही सिग्नल व्यवस्था सुरळीत सुरूच झाली नाही. आज परिस्थिती अशी आहे की काही ठिकाणी सिग्नलचे दिवे गायब आहेत. काही खांबांवर दिव्यांऐवजी इतर साहित्य बसवण्यात आले आहे. तर काही ठिकाणी संपूर्ण यंत्रणा निष्क्रिय अवस्थेत दिसून येते.
प्रमुख ठिकाणी कोंडीचा कहर
छत्रपती शिवाजी महाराज चौक, जुने बसस्थानक चौक, उस्मानाबाद रोड, नळदुर्ग रोड, घाटशिळ रस्ता, विशेषतः मंगळवार, शुक्रवार, शनिवार व रविवार या गर्दीच्या दिवशी भाविकांना प्रचंड वाहतूक कोंडीचा सामना करावा लागतो. बसस्थानकापासून महावितरण कार्यालयापर्यंत केवळ 300 मीटर अंतर पार करण्यासाठी 20 ते 30 मिनिटे लागत असल्याची परिस्थिती आहे.
वाहतूक शाखा कार्यान्वित नाही
तीर्थक्षेत्रात स्वतंत्र, सुसज्ज वाहतूक शाखा नसल्याने धाराशिव येथून वाहतूक पोलिसांना बोलवावे लागते. स्थानिक पातळीवर वाहतूक नियमनाऐवजी केवळ दंड वसुलीवर भर दिला जात असल्याची नागरिकांची नाराजी आहे. वाहतुकीला शिस्त लावण्यासाठी प्रभावी उपाययोजना होत नसल्याचे चित्र दिसून येत आहे.
अपघातांचा धोका वाढला
कोंडीमुळे लहान-मोठे अपघात घडत असून भाविकांच्या सुरक्षेचा प्रश्न निर्माण झाला आहे. भविष्यात ही समस्या अधिक बिकट होण्याची शक्यता नाकारता येत नाही.
खर्चाची चौकशी होणार का?
शहरात अनेक वर्षांपूर्वी बसवलेल्या सिग्नल यंत्रणेवर आतापर्यंत किती खर्च झाला? देखभाल व दुरुस्तीसाठी निधी कुठे गेला? या सर्व बाबींची सखोल चौकशी करण्याची मागणी आता जोर धरू लागली आहे.
आता काय गरजेचे?
बंद पडलेली सिग्नल यंत्रणा तात्काळ दुरुस्त करून सुरू करणे. स्वतंत्र, सर्व सुविधांनी सुसज्ज वाहतूक शाखा कार्यान्वित करणे. गर्दीच्या दिवशी विशेष वाहतूक आराखडा लागू करणे.
स्थानिक लोकप्रतिनिधींनी प्रत्यक्ष लक्ष घालणे
एकंदरीत, प्रारंभीपासून देखभाल अभावी वादात सापडलेली सिग्नल व्यवस्था आता नामशेष होण्याच्या मार्गावर आहे. तीर्थक्षेत्रातील लाखो भाविकांच्या सुरक्षिततेसाठी आणि शहराच्या सुव्यवस्थेसाठी तातडीने ठोस निर्णय घेणे ही काळाची गरज बनली आहे.