धाराशिव (प्रतिनिधी)- तुरोरी “आम्ही केवळ आश्वासनांचे राजकारण करत नाही, तर प्रत्यक्ष केलेल्या विकासकामांच्या जोरावर जनतेच्या न्यायासाठी ही निवडणूक लढवित आहोत,“ अशी ठाम भूमिका खासदार ओमराजे निंबाळकर यांनी व्यक्त केली. आगामी जिल्हा परिषद व पंचायत समिती निवडणूक 2026 च्या पार्श्वभूमीवर, तुरोरी येथे शिवसेना (उद्धव बाळासाहेब ठाकरे) व काँग्रेस आय आघाडीच्या अधिकृत उमेदवारांच्या प्रचारार्थ आयोजित जाहीर सभेत ते बोलत होते. यावेळी व्यासपीठावर महाविकास आघाडीचे पदाधिकारी, शिवसैनिक आणि ग्रामस्थ मोठ्या संख्येने उपस्थित होते. ही सभा प्रामुख्याने उमेदवार संगिता मारुती थोरे, राम शिवाजी मुरमे आणि अंकिता ज्ञानेश्वर चव्हाण यांच्या प्रचारासाठी आयोजित करण्यात आली होती. विकासाचा लेखाजोखा आणि सभेत खासदार ओमराजे निंबाळकर यांनी गेल्या काही वर्षांत शिवसेना (उद्धव बाळासाहेब ठाकरे) पक्षाच्या माध्यमातून परिसरात राबविण्यात आलेल्या विविध योजनांचा आणि विकासकामांचा सविस्तर आढावा मांडला. त्यांनी प्रामुख्याने खालील मुद्द्यांवर प्रकाश टाकला दर्जेदार रस्ते, पाणीपुरवठा योजना आणि अखंडित वीज पुरवठ्यासाठी केलेले प्रयत्न. आरोग्य व शिक्षण: ग्रामीण भागातील आरोग्य सुविधांचे बळकटीकरण आणि शैक्षणिक दर्जा उंचावण्यासाठी राबविलेले
उपक्रम शेतकऱ्यांसाठीच्या मूलभूत सोयी, युवकांसाठी रोजगाराभिमुख उपक्रम आणि महिला सक्षमीकरणावर दिलेला भर ग्रामविकासाच्या माध्यमातून सर्वसामान्य नागरिकांचे प्रश्न सोडवण्यास दिलेले प्राधान्य “जनतेच्या अडचणीच्या काळात आमचे उमेदवार सदैव उपलब्ध राहतील. न्याय, विकास आणि लोकहितासाठी आमची लढाई सातत्याने सुरू राहील,“ असा विश्वास खासदारांनी यावेळी व्यक्त केला.
सभेदरम्यान तिन्ही उमेदवारांनी मतदारांशी थेट संवाद साधला. “आम्ही सत्तेसाठी नाही, तर सेवेसाठी रिंगणात आहोत. प्रामाणिक सेवा आणि पारदर्शक कारभार हीच आमची ओळख असेल,“ अशी ग्वाही उमेदवारांनी यावेळी दिली. या सभेला तुरोरी परिसरातील नागरिक, महिला आणि युवकांचा उत्स्फूर्त प्रतिसाद लाभला. शिवसेना आणि काँग्रेसच्या कार्यकर्त्यांनी विकास आघाडीचा विजय निश्चित असल्याचा निर्धार यावेळी व्यक्त केला. यावेळी स्थानिक पदाधिकारी, युवासेना कार्यकर्ते आणि ग्रामस्थ मोठ्या संख्येने उपस्थित होते.