धाराशि (प्रतिनिधी)- महसूलमंत्री चंद्रशेखर बावनकुळे यांच्या मार्गदर्शनाखाली नोंदणी व मुद्रांक विभागाच्या सुधारित आकृतीबंधास मंजूरी देणारा शासन निर्णय महसूल व वन विभागामार्फत 4 डिसेंबर 2025 रोजी काढण्यात आला आहे.सुधारित आकृतीबंधानुसार विभागातील मंजूर पदांची संख्या 3 हजार 952 इतकी झाली असल्याची माहिती नोंदणी महानिरीक्षक रविंद्र बिनवडे यांनी दिली.
अपर मुख्य सचिव (महसूल, मुद्रांक शुल्क व नोंदणी) यांच्या प्रयत्नांतून, सध्या मंजूर 3 हजार 94 पदांपैकी 107 पदे निरसित करण्यात आली असून 965 नवीन पदांची निर्मिती करण्यात आली आहे.महसूल व वन विभागाच्या 4 डिसेंबर 2025 रोजीच्या शासन निर्णयानुसार एकूण 3 हजार 952 पदांच्या सुधारित आकृतीबंधास अंतिम मान्यता देण्यात आली आहे. नोंदणी व मुद्रांक विभाग हा राज्य शासनाला महसूल मिळवून देणारा दुसऱ्या क्रमांकाचा महत्त्वाचा महसूल विभाग आहे.विभागाचा नव्या आकृतीबंधाचा प्रस्ताव सन 2016 पासून प्रलंबित होता.
नवीन दुय्यम निबंधक कार्यालयांची निर्मिती,वाढती दस्त संख्या आणि वाढते कामकाज लक्षात घेता या निर्णयामुळे विभाग अधिक सक्षम व बळकट होणार आहे.पर्याप्त मनुष्यबळ उपलब्ध झाल्याने शासनाकडून दरवर्षी ठरविलेल्या इष्टांकांच्या पूर्तीत मदत होईल,शासन महसूलात वाढ होईल आणि नागरिकांना अधिक वेगवान व गुणवत्तापूर्ण सेवा देण्याचा शासनाचा व विभागाचा मानस सफल होण्यास ही मंजूरी महत्त्वपूर्ण ठरणार आहे.