कळंब (प्रतिनिधी)- राष्ट्रीय विधी सेवा प्राधिकरण व महाराष्ट्र विधी सेवा प्राधिकरण यांचे निर्देशानुसार जिल्हा विधी सेवा प्राधिकरण उस्मानाबाद यांचे मार्गदर्शनाखाली दिनांक 13 डिसेंबर, 2025 रोजी अतिरिक्त जिल्हा व सत्र न्यायालय, कळंब या ठिकाणी राष्ट्रीय लोकअदालतीचे आयोजन करण्यात आले होते. सदरील लोकअदालतीमध्ये एकुण पाच पॅनल तयार करण्यात आलेले होते. पॅनल क्रमांक एक साठी आर. के. राजेभोसले जिल्हा न्यायाधीश-1 कळंब यांनी पॅनल प्रमुख तर ॲड. ए.एन.गवळी यांनी पॅनल पंच म्हणून कामकाज पाहिले तर पॅनल क्रमांक 2 साठी पी. आर. कुलकर्णी, दिवाणी न्यायाधीश व. स्तर कळंब यांनी पॅनल प्रमुख तर ॲड. ए. पी.कोठावळे यांनी पॅनल पंच म्हणून कामकाज पाहिले. पॅनल क्रमांक 3 साठी के. के. चौधरी, सह दिवाणी न्यायाधीश कनिष्ठ स्तर, कळंब यांनी पॅनल प्रमुख तर ॲड. यु.बी.चौधरी यांनी पॅनल पंच म्हणून कामकाज पाहिले. पॅनल क्रमांक 4 साठी एन. एम. रेड्डी, 2 रे सह दिवाणी न्यायाधीश कनिष्ठ स्तर, कळंब यांनी पॅनल प्रमुख तर ॲड. ए. डी. कांबळे यांनी पॅनल पंच म्हणून कामकाज पाहिले. तर पॅनल क्रमांक 5 साठी ए. डी. जाधव मॅडम, 3 रे सह दिवाणी न्यायाधीश कनिष्ठ स्तर, कळंब यांनी पॅनल प्रमुख तर ॲड. पी. एस. कणसे यांनी पॅनल पंच म्हणून कामकाज पाहिले.
सदरील लोकअदालतीमध्ये पाच पॅनलकडील ठेवण्यात आलेल्या एकुण 126 दिवाणी प्रकरणांपैकी 21 दिवाणी प्रकरणे तडजोडीने मिटविण्यात आली. सदरील प्रकरणामध्ये मोटार अपघात विमा क्लेमच्या 2 प्रकरणामध्ये दहा लाख रूपये तर रक्कम वसुलीबाबतच्या दरखास्तीच्या एकुण 1 प्रकरणामध्ये दोन लाख तीन हजार तीनशे एकोणसाठ रूपये आणि इतर 18 दिवाणी प्रकरणे तडजोडीने मिटविण्यात आली. तसेच विविध स्वरुपाच्या एकुण 75 फौजदारी प्रकरणांपैकी कौटंबिक हिंसाचार प्रकरणातील अपिलाच्या 1 प्रकरणे मिटविण्यात आली. ज्यामध्ये रक्कम दोन लाख वीस हजार रूपये इतक्या रकमेची तडजोड झाली व इतर 1 फौजदारी प्रकरण मिटविण्यात आले. तर गुन्हा कबुलीच्या एकुण 70 प्रकरणांपैकी 22 प्रकरणामध्ये बारा हजार दोनशे रूपये इतकी दंडाची रक्कम वसुल करण्यात आली. त्याचप्रमाणे सदरील लोकअदालतीच्या दिवशी विविध बँका, ग्रामपंचायती, नगर परिषद, पतसंस्था अशा इतर कार्यालयांमार्फत एकुण 1777 दाखलपूर्व (प्री-लिटीगेशन) प्रकरणे सादर करण्यात आलेली होती. त्यापैकी बँकेच्या एकुण 12 दाखलपूर्व (प्री-लिटीगेशन) प्रकरणांमध्ये बँक यांचेमार्फत लोकअदालती दिवशी एकुण रक्कम रुपये तेरा लाख एकोणऐंशी हजार एकशे रूपये इतकी रक्कम वसुल करण्यात आली. त्याचप्रमाणे लोकअदालतीच्या अनुषंगाने नगर परिषद कळंब यांचे वतीने एकुण 32 प्रकरणांमध्ये रक्कम सहा लाख एकसष्ठ हजार तीस रूपये इतकी रक्कम नगर परिषद स्तरावर वसुल करण्यात आली. कळंब तालुक्यातील ग्रामपंचायतीच्या एकुण 433 दाखलपूर्व (प्री-लिटीगेशन) प्रकरणांमध्ये संबंधित ग्रामपंचायतीमार्फत ग्रामपंचायत स्तरावर एकुण रक्कम तीन लाख ब्याऐंशी हजार सहाशे तीन रूपये इतकी रक्कम लोकअदालतीच्या माध्यमातून वसुल करण्यात आल्याची माहिती तालुका विधी सेवा समितीचे अध्यक्ष तथा जिल्हा न्यायाधीश-1 कळंब आर. के. राजेभोसले यांनी दिली. राष्ट्रीय लोकअदालत सुरळीतपणे पार पाडण्यासाठी विधीज्ञ मंडळातील सर्व विधीज्ञ, न्यायालयीन कर्मचारी तसेच पोलिस प्रशासन यांनी परिश्रम घेतले.