उमरगा (प्रतिनिधी)- शहराच्या सर्वांगीण विकासासाठी भरघोस निधी देण्याची ग्वाही देत पालकमंत्री प्रताप सरनाईक यांनी विकास कामाची अखंड ज्योत तेवत ठेवण्याचे काम नगराध्यक्ष म्हणून किरण गायकवाड करतील. मतदारांनी त्यांना मताधिक्य देऊन विकासकामांची संधी द्यावी, असे आवाहन केले.
शिवसेना, काँग्रेस, आरपीआय व लहुजी शक्ती सेना शहर विकास आघाडीचे नगराध्यक्षपदाचे उमेदवार किरण गायकवाड व सदस्यांच्या प्रचारार्थ शुक्रवारी (ता. 28) आयोजित प्रचार सभेत ते बोलत होते.
यावेळी माजी खासदार प्रा. रवींद्र गायकवाड, शिवसेना उपनेते राजन साळवी, भगवान देवकते, माजी आमदार ज्ञानराज चौगुले, ज्येष्ठ नेते जितेंद्र शिंदे, बाजीराव चव्हाण, युवक काँग्रेसचे जिल्हाध्यक्ष अश्लेष मोरे, सिद्रामप्पा चिंचोळे, मोहन पणुरे, बळिराम सुरवसे, मधुकर यादव, अर्जुन बिराजदार, विजय दळगडे यांच्यासह नगरसेवकपदाचे उमेदवार उपस्थित होते. शिवसेना ही कोणत्याही जातीच्या विरोधात नाही. शहरातील मुस्लीम समाजाच्या कब्रस्थानच्या जागेचा प्रश्न आचारसंहिता संपल्यानंतर मार्गी लावू, असे आश्वासन देऊन पालकमंत्री सरनाईक यांनी दिले. यावेळी काँग्रेसचे नानाराव भोसले, सदस्यपदाच्या उमेदवार रेखाताई सूर्यवंशी, लघुजी शक्ती सेनेचे सुखदेव होळीकर, शाहूराज माने यांची भाषणे झाली. भारत मोरे यांनी सूत्रसंचालन केले. ॲड. एस. पी. इनामदार यांनी प्रास्ताविक केले.