धाराशिव (प्रतिनिधी)- पेट्रोल पंपाची साइट सर्च करणे एकास चांगलेच महागात पडले आहे. सायबर भामट्यांनी नवीन पेट्रोल पंपचा परवाना देण्यात येईल, अशी बतावणी करून एकाची तब्बल 37 लाख 99 हजार 500 रूपयांची आर्थिक फसवणूक केली आहे. हा प्रकार भूम तालुक्यातील तांबेवाडी येथे 15 सप्टेंबर ते 15 नोव्हेंबर दरम्यान घडला. याप्रकरणी सायबर पोलिस ठाण्यात गुरूवार दि. 27 नोव्हेंबर रोजी गुन्हा नोंद झाला आहे.
तांबेवाडी येथील आकाश नानासाहेब शिंदे यांना नवीन पेट्रोल पंप हवा होता. त्यांनी इंटरनेटवर पेट्रोल पंपाची प्रक्रिया व साइट सर्च केली. त्यांना अनोळखी व्यक्तीने 7362949329 या मोबाईल क्रमांकावरून संपर्क साधला. नवीन पेट्रोल पंप देण्यात येईल, अशी बतावणी केली. पेट्रोल पंपासाठी ऑनलाईन पध्दतीने फोन पे वरून तांबेवाडी येथे व आरटीजीएसद्वारे भूम येथून पैसे पाठवण्यास सांगितले. आकाश शिंदे यांना वेळोवेळी एकूण 37 लाख 99 हजार 500 रूपये ऑनलाईन पध्दतीने पाठवले. त्यानंतर परवान्यासाठी संपर्क केला. मात्र संबंधित क्रमांकावर संपर्क होवू शकला नाही. दि. 15 नोव्हेंबरपासून संपर्क करण्याचा प्रयत्न केला. संपर्क होवू शकला नाही. त्यानंतर फसवणूक झाल्याचे लक्षात आले.