धाराशिव (प्रतिनिधी)- डॉ. वेदप्रकाश पाटील शैक्षणिक संकुल, गडपाटी, धाराशिव येथील आर.पी.कॉलेज ऑफ फार्मसी महाविद्यालयामध्ये नुकतेच डी. फार्मसी, बी. फार्मसी व एम. फार्मसी प्रथम वर्षातील विद्यार्थ्यांसाठी ओरिएंटेशन व फ्रेशर्स पार्टीचे भव्य आयोजन करण्यात आले होते. डॉ. प्रतापसिंह जी पाटील साहेब यांच्या मार्गदर्शनाखाली हा कार्यक्रम उत्साहात संपन्न झाला.
या कार्यक्रमाला शासकीय आयुर्वेदिक महाविद्यालय, धाराशिव येथील रोगनिदानशास्त्राचे विभाग प्रमुख डॉ. मयूर देशमुख व रामकृष्ण परमहंस महाविद्यालयाचे प्राचार्य डॉ. संदीप देशमुख यांची प्रमुख उपस्थिती लाभली. महाविद्यालयाचे प्राचार्य डॉ. शेख गाझी यांनी प्रास्ताविक करताना नवीन प्रवेशित विद्यार्थ्यांना शुभेच्छा देऊन महाविद्यालयाविषयी सविस्तर माहिती दिली. यावेळी मार्गदर्शन करताना डॉ. मयूर देशमुख यांनी विद्यार्थ्यांशी संवाद साधत त्यांना केवळ 'एंड यूजर' न बनता, संशोधनाविषयी आवड निर्माण करून 'औषध मेकर्स'बनण्याचे मोलाचे आवाहन केले.
यासोबतच, प्राचार्य डॉ. संदीप देशमुख सरांनी औषध निर्माण क्षेत्रातील नवनवीन संधी ओळखून विद्यार्थ्यांनी स्वतःचं व देशाचं नाव उज्ज्वल करावे, असे आवाहन करत त्यांच्या पुढील शैक्षणिक वाटचालीस शुभेच्छा दिल्या. मार्गदर्शनपर सत्रानंतर फ्रेशर्स पार्टीला सुरुवात झाली. नवीन प्रवेशित विद्यार्थ्यांसाठी विविध मनोरंजक गेम्सचे आयोजन करण्यात आले होते. या गेम्समध्ये सहभागी होऊन विद्यार्थ्यांनी आपला उत्साह दाखवला. या स्पर्धेतून मिस्टर फ्रेशर्स आणि मिस फ्रेशर्स या पुरस्कारांसाठी विजेत्या विद्यार्थ्यांची निवड करण्यात आली. कार्यक्रमाचे सूत्रसंचालन कु. मधुलक्ष्मी थोरात, कु. स्नेहा गरड, कु. मंदार माने व कु. सिद्धी विभुते यांनी प्रभावीपणे केले. या उत्साही कार्यक्रमाला महाविद्यालयातील बी. फार्मसी, डी. फार्मसी व एम. फार्मसीचे सर्व विद्यार्थी आणि पालक मोठ्या संख्येने उपस्थित होते. हा कार्यक्रम यशस्वी करण्यासाठी सर्व प्राध्यापक व प्राध्यापक इतर कर्मचाऱ्यांनी परिश्रम घेतले.