धाराशिव (प्रतिनिधी)- धाराशिव नगर पालिकेमध्ये सत्ता आल्यानंतर येत्या पाच वर्षात काय काम करायचे याचे नियोजन केले आहे. शहराचा चारी बाजूने विकास होण्यासाठी नवीन रिंग रोड तयार करणार असल्याची माहिती आमदार राणाजगजितसिंह पाटील यांनी पत्रकार परिषदेत दिली.
यावेळी भाजप जिल्हाध्यक्ष दत्ता कुलकर्णी, नगराध्यक्ष पदाच्या उमेदवार नेहा काकडे, माजी नगराध्यक्ष दत्ता बंडगर, युवराज निळे, ॲड. नितीन भोसले, मधुकर तावडे, चौरे उपस्थित होते. पुढे बोलताना आमदार पाटील यांनी सांगितले की, शहराच्या विकास कामासाठी निधीची कमतरता भासणार नाही. भाजपच्या धाराशिव नगरपरिषद निवडणुकीसाठी प्रसिध्द केलेल्या जाहीरनाम्यात विकासाची पंचसुत्री आहेत असे आमदार पाटील यांनी सांगून, पारदर्शक व भ्रष्टाचारमुक्त प्रशासन, 24 तास पाणी पुरवठा, धुळमुक्त आणि खड्डेमुक्त प्रशस्त रस्ते, दररोज कचरा संकलन व त्यावर प्रक्रिया, शिक्षण, आरोग्य व रोजगार निर्मितीवर भर हे पंचसुत्र असल्याचे सांगितले. शहरातील गुन्हेगारी कमी करण्यासाठी 9 कोटी 80 लाख रूपयांचे सीसीटीव्ही कॅमेरे शहरात बसवले जाणार आहेत. जेणेकरून गुन्हेगारीला आळा बसले. शहरात जवळ असलेल्या विमानतळावरील हवाई धावपट्टी साडेतीन किलोमीटर वाढवून विमान व हेलीकॅप्टर यांचा देखभाल व दुरूस्ती या विमानतळावर करण्यासाठी नियोजन करण्यात आले आहे.
मैत्रीपूर्ण लढत
यावेळी आमदार राणाजगजितसिंह पाटील यांनी महायुतीमधील मित्रपक्ष शिवसेना यांच्यासोबत काही ठिकाणी मैत्रीपूर्ण लढती आहेत. परंतु भाजपच्या नगराध्यक्षपदाचे उमेदवार नेहा काकडे यांना पालकमंत्री प्रताप सरनाईक यांनी पाठिंबा जाहीर केला आहे. त्यामुळे शहरातील विकास कामाबाबत आम्ही मिळून काम करणार आहोत. त्यामुळे निधी कमतरता भासणार नाही असेही आमदार राणाजगजितसिंह पाटील यांनी सांगितले. यावेळी आमदार पाटील यांनी रेल्वे जंक्शन, शिवसृष्टी, मेडिकल कॉलेज, दर्गाह विकास, व्यापारी संकूल, बाग-बगीचे, सामान्य रूग्णालय, धारासूर मर्दिनी, आठवडी बाजार आदीबाबत माहिती दिली.