वाशी (प्रतिनिधी)- बीड-सोलापूर महामार्गावरील पारगाव टोल प्लाझाच्या अव्यवस्थेबद्दल शिवसेनेतर्फे जोरदार आक्षेप नोंदवण्यात आला असून पारगाव सर्कलमधील सर्व वाहनांना तत्काळ टोलमाफी देण्यात यावी, अशी लेखी मागणी प्रकल्प संचालकांकडे करण्यात आली आहे. याची प्रत जिल्हाधिकाऱ्यांनाही पाठविण्यात आली आहे.
महामार्गावरील दुरवस्था, मोठे खड्डे, वाढते अपघात, अस्वच्छ स्वच्छतागृहे, पारगाव चौकातील असुरक्षित वळण, प्रकाश व्यवस्थेचा अभाव आणि टोल परिसरातील वाढत्या त्रासामुळे नागरिक त्रस्त असल्याचे निवेदनात नमूद करण्यात आले आहे. शिवसेना उपतालुका प्रमुख विकास तळेकर यांनी सांगितले की, सुविधाच नसताना नागरिकांकडून टोल आकारणे अन्यायकारक आहे. तात्काळ रस्ता दुरुस्ती, वळण सुधारणा, 24 तास रुग्णवाहिका सेवा, बायपासवर प्रकाशयोजना आणि टोलवरील गैरप्रकार थांबविण्याची मागणी करण्यात आली आहे. 15 दिवसांत सुधारणा न झाल्यास 15 जानेवारी रोजी टोल प्लाझावर रास्तारोको आंदोलनाचा इशारा देण्यात आला आहे.