भूम (प्रतिनिधी)- भूम तालुक्यातील हिवर्डा येथील पार्थसारथी अरुण मुंढे हिची कझाकिस्तान येथे होणाऱ्या ज्युनिअर बिली जीन किंग कप या प्रतिष्ठीत टेनिस स्पर्धेसाठी भारताच्या संघात निवड झाली आहे. तिच्या समवेत ओडिशा येथील आहान व दिल्ली येथील आनंदिता उपाध्याय हे देखील भारताचे प्रतिनिधित्व करणार आहेत.
हिवर्डा येथील अरुण मुंढे हे बीड येथे धर्मादाय आयुक्त कार्यालयाचे कार्यालयीन अधीक्षक असून आई अनिता या गृहिणी आहेत. तर भाऊ हर्षवर्धन पुणे येथे शिक्षण घेत आहेत. लेकीच्या खेळाची आवड जपण्यासाठी त्यांनी पुणे येथे पार्थसारथी हिस पी.वाय.सी. हिंदू जिमखाना येथे प्रशिक्षणासाठी ठेवले आहे. तिने टेनिस खेळाचे प्राथमिक धडे वयाच्या 6 व्या वर्षी सोलापूर येथे गिरवण्यास सुरुवात केली. सोलापूरचे सुधीर सालगुडे, इमरान शेख व उमेश सर यांच्या प्रशिक्षण केंद्रात 2015 साली पार्थसारथी ने प्रवेश घेतला. सोलापूर येथे स्थानिक स्पर्धेत चमकदार कामगिरी करत असल्याने खेळात विशेष सुधारणा करण्यासाठी पुणे येथे सुरुवातीस एक वर्ष डेक्कन जिमखाना येथे प्रशिक्षक संदीप कीर्तने यांच्या मार्गदर्शनाखाली अभ्यास सुरू केला. नंतर पी.वाय.सी. हिंदू जिमखाना येथे गेल्या 2 वर्षांपासून ती आंतरराष्ट्रीय प्रशिक्षक हेमंत बेंद्रे यांच्या मार्गदर्शनाखाली अनेक स्पर्धात चमकदार कामगिरी करत आहे.
या जिमखान्याकडून खेळताना तिला स्पेन चा टेनिसपटू कारलोस अल्काराझ याचे प्रशिक्षक सॅम्युल लोपेज यांचे देखील मार्गदर्शन मिळाले. आजपर्यंत तिने 9 राष्ट्रीय स्पर्धा खेळल्या आहेत. साल 2023 व 2024 मध्ये वैयक्तिक प्रकारात राष्ट्रीय स्पर्धेत सलग दोन वेळा 14 वर्ष वयोगटात उपविजेतेपद मिळवले. तर 2024 मध्ये तिने 16 वर्ष वयोगट वैयक्तिक व मिश्र तसेच 18 वर्ष वयोगटात राष्ट्रीय ज्युनिअर कप स्पर्धेत वैयक्तिक असे एकाच वर्षी तीन जेतेपदास गवसणी घातली. तिने राज्यस्तरीय व राष्ट्रीय स्तरावर केलेल्या चमकदार कामगिरीसाठी महाराष्ट्र लॉन टेनिस असोसिएशनच्या वतीने प्लेअर ऑफ द ईअर चा पुरस्कार देऊन तिला गौरविण्यात आले आहे. ती सध्या महाराष्ट्रातील क्रमांक 1 ची टेनिसपटू असून तिचा भारतात 16 वर्ष वयोगटात 4 था तर 19 वर्ष वयोगटात 10 वा क्रमांक आहे. 30 मार्च ते 3 एप्रिल दरम्यान टेनिस महासंघाने दिल्ली येथे देशातील टॉप 6 खेळाडूंच्या शिबिराचे आयोजन केले होते व त्यामधून पार्थसारथी ची या स्पर्धेसाठी निवड करण्यात आली आहे. ज्युनिअर बिली जीन किंग कप स्पर्धेसाठी भारताच्या कोलकत्ता येथील प्रसिद्ध कोच अमृता मुखर्जी या स्पर्धेत तिला मार्गदर्शन करणार असून 12 ते 17 मे दरम्यान ही स्पर्धा कझाकिस्तान येथे होणार आहे. हिवर्डा गावात या बाबत माहिती मिळाल्यानंतर फटाके फोडून जल्लोष करण्यात आला. पार्थसारथी ने ही स्पर्धा जिंकून देशाचे नाव उज्वल करावे हीच भावना गावातील प्रत्येक नागरिकाच्या चेहऱ्यावर आनंद साजरा करताना दिसत होती.