धाराशिव (प्रतिनिधी)- आठ जणांनी मिळून बायोडिझेल वितरण एजन्सी देण्याचे आमिष दाखवून 32 लाख 22 हजार 493 रूपयांची फसवणुकीचा प्रकार उघडकीस आला आहे. त्या व्यक्तीला एजन्सी न देता फसवणूक केली आहे. फसवणूक झाल्याचे लक्षात येताच नळदुर्ग पोलिस ठाणे गाठून 11 डिसेंबर रोजी फिर्याद दिली. यावरून आठ जणांविरूध्द फसवणुकीचा गुन्हा नोंद झाला आहे.
तुळजापूर तालुक्यातील जळकोट येथील प्रफुल्ल कारले यांना हिंदूस्तान बायोडिझेल इंडस्ट्रीज प्रा. लि. चे संचालक रतन जांगीड, नारायण जांगीड, अजय तनवर (तिघे रा. रतलाम मध्यप्रदेश), नितीन आराख, अजय खरात, अंजली आंबेकर, प्रथमेश देशमुख, रोहित सिंग (सर्व रा. विमाननगर पुणे व दुसरा पत्ता जातवाडी रोड सेंट्रल जेल हर्सुलच्या पाठीमागे संभाजीनगर) यांनी 14 ऑक्टोबर रोजी जळकोट येथे संपर्क साधला. त्यानंतर प्रफुल्ल कारले यांना नमूद व्यक्तींनी बायोडिझेल वितरणाची एजन्सी देतो असे खोटे आमिष दाखवून वेळोवेळी 32 लाख 22 हजार 593 रूपये घेवून रकमेचा अपहार करून आर्थिक फसवणूक केली. त्यानंतर शिवीगाळ करून जिवे मारण्याची धमकी दिली. अशी फिर्याद प्रफुल्ल कारले यांनी 11 डिसेंबर रोजी नळदुर्ग पोलिस ठाण्यात दिली. त्यावरून गुन्हा नोंद झाला आहे.