तुळजापूर (प्रतिनिधी)- कृषी उत्पन्न बाजार समितीच्या मुख्य बाजार आवारात तुळजापूर तालुका खरेदी विक्री संघ तुळजापूर व नाफेड मुंबई यांच्यामार्फत सोयाबीन हमीभाव खरेदी केंद्र सुरू करण्यात आलेले आहे. सोयाबीन खरेदी केंद्र सुरू झालेले असल्याने शेतकरी वर्गातून समाधान व्यक्त करण्यात येत आहे.
याप्रसंगी खरेदी विक्री संघ तुळजापूरचे चेअरमन सुनील जाधव, सुधीर कदम, बाजार समितीचे व्यापारी संचालक बालाजी रोचकरी, श्याम पवार, मार्केटिंग फेडरेशन धाराशिवचे अधिकारी आबासाहेब मगर, बाजार समितीचे सचिव उमेश भोपळे, शेतकरी मकरंद लबडे, खुशाबा सूर्यवंशी, दिलीप गडदे, शेतकरी व हमाल बांधव मोठ्या प्रमाणात उपस्थित होते. त्यावेळी मार्केट फेडरेशन तालुका खरेदी विक्री संघ तुळजापूर व बाजार समिती तुळजापूर यांच्यातर्फे शेतकरी बांधवांना सोयाबीन हमीभाव खरेदी केंद्राचा लाभ घेण्याचे आवाहन करण्यात आले. शेतकरी बांधवांना यांना आपल्या सोयाबीन हा शेतमाल किडे, कचरा विरहित स्वच्छ शेतमाल खरेदी केंद्रावर विक्रीसाठी आणावे असे आवाहन करण्यात आले. शेतकऱ्यांना आपल्या सातबारा, आधार कार्ड, बँक पासबुक झेरॉक्स इत्यादी आवश्यक कागदपत्रे घेऊन ऑनलाईन नोंदणी दिनांक 30 नोव्हेंबर 2024 पर्यंत करून घ्यावी व शासकीय सोयाबीन खरेदी केंद्राचा लाभ घ्यावा असे आवाहन चेअरमन सुनील जाधव यांनी केले.