पहिले बक्षीस - महिंद्रा स्कॉपियो
दुसरे बक्षीस - महिंद्रा ट्रॅक्टर
सुवर्ण पदक विजेत्यास 20 बुलेट तर रौप्य पदक विजेत्यास 20 शाईन मोटारसायकल वाटप
धाराशिव (प्रतिनिधी)-महाराष्ट्र राज्य कुस्तीगीर परिषद व आदर्श शिक्षण प्रसारक मंडळ यांच्या संयुक्त विद्यमाने आयोजित 65 व्या महाराष्ट्र केसरी कुस्ती स्पर्धेचे आयोजन दि. 16 ते 20 नोव्हेंबर या दरम्यान करण्यात आले होते. या स्पर्धेचे मुख्य आयोजक सुधीर पाटील यांच्या नेतृत्वाखाली संपन्न झालेल्या स्पर्धेचा बक्षीस वितरण सोहळा स्वस्तिक मंगल कार्यालय येथे पार पडला.
या सोहळ्याला धाराशिव मतदार संघाचे खासदार ओमप्रकाश राजेनिंबाळकर, माजी विधान परिषद सदस्य सुजितसिंह ठाकूर, अर्जून वीर पुरस्कार विजेते काकासाहेब पवार, महाराष्ट्र कुस्तीगीर परिषदेचे सचिव वामनराव गीते, राष्ट्रवादी कॉग्रेस पक्षाचे अजित पवार गटाचे जिल्हाध्यक्ष महेंद्र धुरगुडे तर शरद पवार गटाचे जिल्हाध्यक्ष संजय पाटील दुधगावकर, भाजपा राज्य कार्यकरणी सदस्य बसवराज मंगरूळे, विनोद गपाट, सतीश देशमुख, राज्य बार असोसिएशनचे अध्यक्ष ॲड. मिलिंद पाटील, हनमंत मडके, काकासाहेब सांळुखे, नवनाथ जगताप, युवराज राक्षे, किरण मोरे, नगर सेवक सोमनाथ गुरव, डॉ . चंद्रजित जाधव, सिद्धी विनायक ग्रुपचे संस्थापक दत्ताभाऊ कुलकर्णी, संस्थेचे सरचिटणीस प्रेमाताई पाटील, प्रशासकीय अधिकारी आदित्य पाटील यांची प्रमुख उपस्थिती होती. 65 व्या महाराष्ट्र केसरीचा विजेता नांदेडाचा शिवराज राक्षे याला महिंद्रा स्कॉर्पियो तर उपविजेता नाशिकचा हर्षवर्धन सदगीर यांना महिंद्रा ट्रॅक्टरचे मान्यवरांच्या हस्ते वितरण करण्यात आले.या स्पर्धेतील 20 गटातील विजेत्यांना पारितोषिक म्हणून बुलेट व शाईन गाड्यांचे वितरण मान्यवरांच्या हस्ते करण्यात आले. या स्पर्धेचे नियोजन युवा नेते अभिराम पाटील यांनी केले होते. तर काकासाहेब पवार यांच्या मार्गदर्शनाखाली झालेल्या या स्पर्धेला प्रचंड प्रतिसाद राज्यभरातील क्रीडा शौकिकांनी दिला होता. आदर्श शिक्षण प्रसारक मंडळाचे अध्यक्ष सुधीर पाटील यांनी प्रास्ताविक केले. सर्व मान्यवरांनी आपल्या मनोगतात आयोजक सुधीर पाटील तथा युवानेते अभिराम पाटील यांचे या यशस्वी स्पर्धेसाठी आभार मानून विशेष कौतुक केले.