धाराशिव (प्रतिनिधी)-आगामी शारदीय नवरात्र महोत्सवाच्या अनुषंगाने तुळजापूर शहरातील तसेच परिसरातील सर्व ठिकाणची हॉटेल्स, धाबे येथील तपासणी करून अन्न व औषध प्रशासन विभागाने शहरातील व्यापार्‍यांनी विक्रीस ठेवलेल्या हळद-कुंकू ची तपासणी करून नकली व हानिकारक रसायनिक हळद कुंकू च्या विक्रीस प्रतिबंध करावा. सुरक्षा व्यवस्था व भाविकांना सुलभरित्या दर्शन व्हावे व या कालावधीत कायदा व सुव्यवस्था अबाधित राहावी यासाठी पोलीस प्रशासनाने तसेच मंदिर प्रशासनाने भाविकांच्या सोयी सुविधेबाबत आतापासूनच नियोजन करावे असे निर्देश जिल्हाधिकारी तथा मंदिर संस्थानचे अध्यक्ष डॉ. सचिन ओम्बासे यांनी तुळजाभवानी मंदिर संस्थान येथे सर्व विभाग प्रमुखांची यात्रा व्यवस्था व बंदोबस्ताच्या नियोजनासंदर्भात आयोजित पूर्वतयारी आढावा बैठकीत दिले.
यावेळी जिल्हा परिषदेच्या प्रभारी मुख्य कार्यकारी अधिकारी प्रांजल शिंदे, जिल्हा पोलीस अधीक्षक अतुल कुलकर्णी, अप्पर जिल्हा अधिकारी शिवाजी शिंदे, सहाय्यक जिल्हा अधिकारी प्रियंवदा म्हाडदळकर, सामान्य प्रशासनाचे उपविभागीय अधिकारी संतोष भोरे, जिल्हा आरोग्य अधिकारी डॉ. सतीश हरिदास, उपविभागीय अधिकारी योगेश खरमाटे, मंदिर संस्थानचे तहसीलदार संतोष पाटील, जिल्हा आपत्ती व्यवस्थापन अधिकारी वृषाली तेलोरे तसेच जिल्हा जिल्ह्यातील सर्व विभागाचे प्रमुख यावेळी उपस्थित होते.
शारदीय नवरात्र महोत्सव शके 1945 प्रति वर्षाप्रमाणे श्री तुळजाभवानी मंदिर संस्थान तर्फे यंदाचा नवरात्र महोत्सव 6 ते 30 ऑक्टोबर पर्यंत साजरा करण्यात येणार आहे. हा महोत्सव भाविकांसाठी आनंदमय व भक्तिमय तर राहणारच आहे परंतु येणार्‍या प्रत्येक भाविकास उत्कृष्ट नियोजन, चोख बंदोबस्त, सेवा, सुविधा आणि समाधान मिळेल या उद्देशाने कार्य करण्याचे जिल्हाधिकर्‍यांमार्फत आवाहन करण्यात आले.