येथील 100 प्रवेश क्षमतेचे शासकीय वैद्यकिय महाविद्यालय आणि 500 खाटांच्या क्षमतेच्या रुग्णालयासाठी जागा निश्चितीकरण करुन आरोग्य विभाग आणि वैद्यकिय शिक्षण यांच्यात सामंजस्य करार करावा. संबंधित अहवाल पुढील आठ दिवसात सादर करावा, असे निर्देश वैद्यकिय शिक्षण मंत्री अमित देशमुख आज मुंबईत झालेल्या बैठकीत दिले. आज झालेल्या बैठकीमुळे वैद्यकीय महाविद्यालयाच्या कामाला गती आल्याची प्रतिक्रिया आमदार कैलास पाटील यांनी व्यक्त केली.
विधानभवन येथे सिंधूदुर्ग आणि उस्मानाबाद वैद्यकिय महाविद्यालयाबाबत आढावा बैठकीचे आयोजन करण्यात आले होते. त्यावेळी श्री.देशमुख बोलत होते. यावेळी उस्मानाबादचे पालकमंत्री तथा राज्याचे मृद व जलसंधारण मंत्री शंकरराव गडाख यांनी उस्मानाबाद येथील महाविद्यालय आणि रुग्णालयास मान्यता आहे. पुढील कार्यवाहीस गती दिल्यास नागरिकांना दिलासा मिळेल, असे सांगितले. या बैठकीस उच्च व तंत्र शिक्षण मंत्री उदय सामंत, पर्यावरण मंत्री आदित्य ठाकरे, सिंधूदुर्गचे खासदार विनायक राऊत (दूरदृश्य प्रणालीद्वारे), उस्मानाबादचे खासदार ओमराजे निंबाळकर, दोन्ही जिल्ह्यांतील स्थानिक आमदार सर्वश्री दीपक केसकर, वैभव नाईक, राणा जगजितसिंह पाटील, कैलास पाटील, ज्ञानराज चौगुले, उस्मानाबादचे जिल्हाधिकारी कौस्तुभ दिवेगावकर, सिंधूदुर्गचे जिल्हाधिकारी के.मंजुलक्ष्मी यांच्यासह इतर अधिकारी उपस्थित होते. वैद्यकिय शिक्षण मंत्री श्री. देशमुख यांनी उस्मानाबाद येथील वैद्यकीय महाविद्यालय आणि रुग्णालयासंदर्भातील कामांना गती द्यावी.जागा निश्चीतीकरण करुन बांधकामाचे अंदाजपत्रक सादर करावे. तसेच, सामंजस्य करारासंदर्भातील अटींची पूर्तता करण्यात यावी. यासंदर्भातील पदभरती करण्याच्या कार्यवाहीस गती द्यावी, असे यावेळी निर्देश दिले.
सिंधूदुर्ग येथील वैद्यकीय महाविद्यालयाचाही श्री.देशमुख यांनी आढावा घेतला. यावेळी श्री.देशमुख म्हणाले, प्रवेश प्रक्रिया सुरु झाली असून, पुढील सहा महिन्यात नियमानुसार प्रथम आणि द्वितीय वर्षासाठी इमारतीचे तातडीने बांधकाम करण्यासाठी सार्वजनिक बांधकाम विभागाकडे काम देण्यात यावे. अधिष्ठाता यांची नियमित नियुक्ती करण्यात येईल. निधीची पूर्तता करण्यात येणार असल्याचेही मंत्री श्री.देशमुख यांनी यावेळी सांगितले.