उस्मानाबाद - राष्ट्रीय स्वयंसेवक संघ जनकल्याण समिती महाराष्ट्र प्रांत यांच्या वतीने देण्यात येणाऱ्या स्वामी विवेकानंद युवा पुरस्कार भटके विमुक्त विकास प्रतिष्ठान च्या तुळजापूर तालुक्यातील यमगरवाडी येथील एकलव्य आश्रमशाळेतील सामाजिक कार्यकर्त्या संगिता पाचंगे यांना जनकल्याण समितीचे प्रदेश उपाध्यक्ष प्राध्यापक रमेश राव जोशी, जिल्हाध्यक्ष डॉ आदिनाथ राजगुरू यांच्या हस्ते प्रदान करण्यात आला.41 हजार रुपये रोख सन्मानचिन्ह,असे या पुरस्काराचे स्वरूप आहे. यावेळी व्यासपीठावर कल्याण समितीचे श्री तुषार जुवेकर राष्ट्रसेविका समितीच्या सेविका सौ उज्वला मसलेकर आणि पुरस्कारार्थी संगीता पाचंगे उपस्थित होत्या.
यावेळी प्रमुख वक्ता म्हणून बोलताना सौ. उज्वला मसलेकर म्हणाल्या की स्वामी विवेकानंदांनी सांगितल्याप्रमाणे भटक्या-विमुक्तांच्या यमगरवाडी सेवा प्रकल्पावर भटक्या विमुक्त समाजातील दरिद्री नारायणाची सेवा करणाऱ्या , सेवा आणि सत्कार्यात देव शोधणाऱ्या संगीता पाचंगे यांच्या कार्यातून प्रेरणा घेऊन कार्य करण्याची गरज आहे. स्वामी विवेकानंदांच्या स्वप्नातील सक्षम तरुण पिढी घडवण्यासाठी संगीता पाचंगे सारख्या सामाजिक काम करणाऱ्या युवक-युवतींना प्रोत्साहन मिळण्याची गरजआहे. स्वामी विवेकानंदांचा स्वप्नातील भारत उभा करण्यासाठी सक्षम पिढी घडवणाऱ्या कार्यकर्त्यांना प्रोत्साहन मिळण्याची गरज ही त्यांनी व्यक्त केली. नीरक्षीर वृत्तीला जागी ठेवून सध्याच्या काळातही स्वामी विवेकानंदांच्या विचारांनी सक्षम तरुण पिढी घडवण्याची जबाबदारी आपली असल्याचे त्या म्हणाल्या.
तर जनकल्याण समितीचे श्री तुषार जुवेकर यांनी कोरोना आपत्तीच्या काळात जनकल्याण समितीने केलेल्या कार्याचा आढावा उपस्थितांसमोर घेतला. जनकल्याण समितीने महाराष्ट्रात या काळात केलेले अन्नदान वस्तूंचे किट वाटप , मास्क वाटप , तसेच अन्य कामांचा आढावा घेतला. तर जिल्ह्यातील कामात जिल्हा शासकीय रुग्णालयात कोरोना प्रतिबंधात्मक सॅनिटायझर किट उभारणी , जिल्ह्यातील गरजूंना अन्नधान्य किट वाटप , मास्क वाटप , प्रतिबंधात्मक काढा वाटप इथपासून जीवनावश्यक वस्तूंचे वाटप करण्यात जनकल्याण समितीचे कार्यकर्ते अग्रेसर असल्याची माहिती डॉ आदिनाथ राजगुरू यांनी यावेळी सादर केली.
यावेळी सौ संगीता पाचंगे यांना स्वामी विवेकानंद युवा पुरस्कार मान्यवरांच्या हस्ते वितरित करण्यात आला. पुरस्काराची 41 हजारांची रक्कम पाचंगे यांनी तुळजापूर तालुक्यातील यमगरवाडी इथं भटके-विमुक्तांसाठी चालवल्या जाणाऱ्या एकलव्य आश्रम शाळेच्या प्रकल्पाकडे सुपूर्द केली.
कार्यक्रमाचे सूत्रसंचालन श्री शंकर पांढरे यांनी केले तर आभार प्रदर्शन ॲड श्रीकृष्ण मसलेकर यांनी केले