तुळजापूर (प्रतिनिधी)- आधीच अत्यल्प पावसामुळे दुष्काळाच्या झळा सोसणाऱ्या तुळजापूर तालुक्यातील शेतकऱ्यांच्या अडचणी आता आणखी वाढल्या आहेत. शेतात पिके नसल्याने आणि शेताकडे जाणारी वर्दळ कमी झाल्याने चोरट्यांनी शेतातील विहिरींवरील विद्युत मोटारी, केबल आणि वायर चोरण्याचा सपाटा लावल्याची तक्रार शेतकरी वर्गातून होत आहे. पिकांचे नुकसान, आर्थिक अडचणी आणि पाण्याची टंचाई अशा संकटांशी झुंज देणाऱ्या शेतकऱ्यांवर आता चोरीच्या संकटामुळे दुहेरी आर्थिक भार पडत आहे.
शेतातील वर्दळ कमी, चोरट्यांना संधी
तुळजापूर तालुक्यातील अनेक गावांमध्ये शेतातील मोटारी, केबल आणि विद्युत तारा चोरीला जाण्याच्या घटना वाढल्याचे शेतकऱ्यांचे म्हणणे आहे. दुष्काळी परिस्थितीमुळे शेतांमध्ये पिके कमी असून, शेतकऱ्यांची शेताकडे होणारी नियमित ये-जा देखील घटली आहे. याच परिस्थितीचा फायदा घेत चोरटे विहिरीवरील मोटारी आणि केबल चोरून नेत असल्याची तक्रार आहे.
शेतातील विद्युत मोटार चोरीला गेल्यानंतर केवळ मोटारीची किंमत एवढेच नुकसान होत नाही, तर केबल बदलणे, नवीन मोटार बसविणे आणि दुरुस्तीचा खर्चही शेतकऱ्यांना सहन करावा लागतो. आधीच हातात उत्पन्न नसताना हा अतिरिक्त खर्च उचलायचा कसा, असा प्रश्न शेतकऱ्यांसमोर उभा आहे.
वायर जाळून तांबे विक्रीचा संशय
चोरी केलेल्या वायर जाळून त्यातील तांबे काढले जाते आणि ते कमी किमतीत विकले जाते, तर काही मोटारी जुन्या साहित्याच्या स्वरूपात किंवा सेकंडहँड बाजारात विकल्या जात असल्याचा संशय शेतकरी व्यक्त करीत आहेत. या चोरीच्या साहित्याची खरेदी-विक्री कुठे होते, याचाही तपास होणे आवश्यक असल्याचे शेतकऱ्यांचे म्हणणे आहे.
चोरट्यांनी शेतातील विहिरी आणि बोअरवेलमधील विद्युत मोटारी तसेच कडबा कुट्टी मशीन बोरचे लांबच लांब केबल चोरण्याचा सपाटा लावल्याची तक्रार शेतकरी वर्गातून होत आहे. तब्बल 60 फुटांपासून ते 500 फुटांपर्यंतच्या केबल चोरीला जात असल्याचे शेतकरी सांगत आहेत. विहिरीतील मोटारीचे केबल चोर ताना केबल चोरण्यासाठी मोटारी वर काढून घेऊन केबल कट केल्यानंतर वरूनच मोटारी टाकून देत आहेत यात मोटारी आढळून पुन्हा नुकसान होत आहे विशेषता नवे केबल चोरण्याचा सपाटा चोरट्याने लावला आहे
पाण्यासाठी धडपड, त्यात मोटारी चोरीला!
दुष्काळामुळे शेतातील उत्पादनात मोठी घट झाली आहे. उपलब्ध असलेल्या थोड्याफार पाण्याचा वापर करून पिके जगविण्यासाठी शेतकरी धडपड करीत आहेत. अशा परिस्थितीत विहिरीवरील मोटार किंवा केबल चोरीला गेल्यास पाणी असूनही ते पिकांना देता येत नाही. परिणामी, उरलेली पिके वाचविण्याचे प्रयत्नही अडचणीत येतात.
एका बाजूला निसर्गाची अवकृपा आणि दुसऱ्या बाजूला चोरीच्या घटना, अशा दुहेरी संकटात शेतकरी सापडला आहे. मोटार व केबल चोरीमुळे आर्थिक नुकसान होण्याबरोबरच शेतीच्या कामातही अडथळे निर्माण होत आहेत.
तपासाला गती कधी मिळणार?
शेतातील मोटारी आणि केबल चोरीच्या घटनांबाबत प्रभावी तपास होत नसल्याची भावना शेतकऱ्यांमधून व्यक्त होत आहे. चोरट्यांचा शोध घेऊन चोरीच्या घटनांना आळा घालण्यासाठी पोलिसांनी अधिक लक्ष देण्याची गरज असल्याचे शेतकरी सांगत आहेत. चोरीच्या घटनांमागील आरोपींचा शोध, चोरीच्या साहित्याची विक्री करणाऱ्या ठिकाणांची तपासणी आणि अशा गुन्ह्यांची पुनरावृत्ती रोखण्यासाठी ठोस उपाययोजना करण्याची मागणी होत आहे.
या प्रश्नावर सत्ताधारी आणि विरोधी पक्षांतील लोकप्रतिनिधींनीही लक्ष घालावे, अशी अपेक्षा शेतकरी व्यक्त करीत आहेत. आधीच दुष्काळामुळे आर्थिक कंबरडे मोडलेल्या शेतकऱ्यांना चोरीच्या संकटातून दिलासा देण्यासाठी प्रशासनाने पुढाकार घेण्याची गरज आहे.
विशेष तपास पथकाची मागणी
तुळजापूर तालुक्यातील मोटार, केबल आणि विद्युत वायर चोरीच्या घटनांची गांभीर्याने दखल घेऊन विशेष तपास पथक स्थापन करावे, प्रलंबित प्रकरणांचा वेगाने तपास करावा आणि चोरीस गेलेले साहित्य शोधून संबंधित आरोपींवर कारवाई करावी, अशी मागणी त्रस्त शेतकरी वर्गातून होत आहे. दुष्काळाने शेतातील उत्पन्न हिरावले आणि चोरीच्या घटनांनी शेतीसाठीची साधनेही धोक्यात आणली. अशा परिस्थितीत शेतकऱ्यांना न्याय देण्यासाठी पोलिस प्रशासन आणि संबंधित यंत्रणा नेमकी कोणती पावले उचलणार, याकडे तालुक्यातील शेतकऱ्यांचे लक्ष लागले आहे.