धाराशिव (प्रतिनिधी)- तुळजापूर तालुक्यातील तामलवाडी साठवण तलाव परिसरात 13 वर्षीय अल्पवयीन मुलाचा कुऱ्हाडीने वार करून निर्घृण खून करून मृतदेह गवताखाली फेकून दिल्याची धक्कादायक घटना उघडकीस आली असून, या प्रकरणातील मुख्य आरोपी ओमकार देवीदास कांबळे यास तामलवाडी पोलिसांनी अटक केली आहे.
ही घटना दिनांक 05 जानेवारी 2026 रोजी तामलवाडी साठवण तलावाजवळ उघडकीस आली. याप्रकरणी तामलवाडी पोलीस ठाण्यात गुन्हा क्रमांक 04/2026 कलम 103(1) भा.न्या.सं. अन्वये दिनांक 06 जानेवारी 2026 रोजी गुन्हा दाखल करण्यात आला आहे. सोलापूर, धुळे राष्ट्रीय महामार्गालगत तामलवाडी शिवारात कदम यांची शेती असून, ती दत्ता कोरे बटईने करत होता. याच ठिकाणी उमरगा तालुक्यातील कोळसूर येथील ओमकार कांबळे हा आपल्या भावजयी ज्योती कांबळे हिच्यासह सालगडी म्हणून काम करत होता. ज्योती कांबळे हिचा 13 वर्षीय मुलगा कृष्णा सदानंद कांबळे हा कधी वडिलांकडे तर कधी आईकडे राहत असे. कृष्णा याला आपल्या आई व चुलत्यामधील अनैतिक संबंधाची माहिती होती व तो ही बाब वडिलांना सांगत असल्याने आरोपी ओमकार कांबळे याला राग आला. त्यामुळे कृष्णा हा त्यांच्या संबंधात अडसर ठरत असल्याच्या रागातून, आरोपीने दिनांक 01 जानेवारी 2026 रोजी दुपारी सुमारे 12 वाजता, तामलवाडी साठवण तलावातील पाणी उपसा करणाऱ्या विद्युत पंपाचा पाईप बसवण्याच्या बहाण्याने कृष्णा यास तलावाजवळ नेले. तेथे कुऱ्हाडीने वार करून त्याचा खून केला व मृतदेह तलावाजवळील गवताखाली फेकून देऊन तो फरार झाला.
या घटनेची नोंद प्रथम अकस्मात मृत्यू क्रमांक 02/2026 कलम 194 बी.एन.एस.एस. अन्वये करण्यात आली होती. मृताची ओळख पटताच पुढील तपासात गुन्हा उघडकीस आला. गुप्त बातमीदार व तांत्रिक विश्लेषणाच्या आधारे तामलवाडी पोलिसांनी आरोपी ओमकार देवीदास कांबळे यास उमरगा तालुक्यातील कोळसूर गावातून ताब्यात घेतले. चौकशीत आरोपीने गुन्ह्याची कबुली दिली आहे. ही संपूर्ण कामगिरी पोलीस अधीक्षक रितु खोखर, अपर पोलीस अधीक्षक शफकत आमना, उपविभागीय पोलीस अधिकारी डॉ. निलेश देशमुख यांच्या मार्गदर्शनाखाली सहाय्यक पोलीस निरीक्षक गोकुळ ठाकुर, पोलीस हवालदार जुबेर काझी, दिनकर तोगे, पोलीस अंमलदार सुरज नरवडे, उमेश माने, नजीर बागवान, चालक पोलीस हवालदार तुराब शेख, हनमंत कोरे व नितीन भोसले यांनी यशस्वीपणे पार पाडली आहे.