तेर (प्रतिनिधी)- धाराशिव तालुक्यातील तेर येथे सुरू असलेल्या विकास कामांचा आमदार राणाजगजितसिंह पाटील यांनी आढावा घेतला.
संतश्रेष्ठ गोरोबाकाका यांच्या पदस्पर्शाने पावन झालेल्या धाराशिव तालुक्यातील तेरला मोठा ऐतिहासिक वारसा लाभला आहे. तेरला जागतिक पर्यटन केंद्राच्या नकाशावर आणण्यासाठी एक व्यापक दृष्टिकोन डोळ्यासमोर ठेवून आपण सुरू केलेल्या प्रयत्नांना यश मिळत असल्याने मोठे आत्मिक समाधान लाभत आहे. हजारो वर्षापासून तेरच्या प्राचीन भूमीवरुन एक समृद्ध नागरी वस्तीची अनेक अभिमानस्थळे आजही आपल्याला पहायला मिळतात. दोन हजार वर्षाचा हा समृद्ध वारसा अनुभवता यावा यासाठी तेरला जागतिक दर्जाचे पर्यटन केंद्र म्हणून विकसित करण्याचा आपला प्रयत्न आहे.आपल्या महायुती सरकारने तेर आणि परिसरातील प्राचीन वास्तू आणि मंदिरांना गतवैभव मिळावे यासाठी मोठ्या प्रमाणात निधी उपलब्ध करून दिला आहे. संतश्रेष्ठ गोरोबा काका यांच्या समाधी मंदिराच्या जीर्णोद्धारासाठी पहिल्या टप्प्यात 13 कोटी रुपये उपलब्ध झाले आहेत. सध्या तेर येथील पुराणवस्तू संग्रहालयाचे काम अंतिम टप्यात आहे. कोट टेकडीवर उत्खननाची जिवंत प्रात्यक्षिक प्रयोगशाळा विकसित करण्याचे काम सुरु आहे. त्यासाठी आपण मोठा पाठपुरावा करून 13 कोटी 38 लाख रुपयांचा निधी उपलब्ध करून दिला आहे. प्राचीन तीर्थकुंडासाठी 5 कोटी 11 लाख, बौद्ध स्तूप विकसित करण्यासाठी 2 कोटी 21 लाख रुपये निधी उपलब्ध झाला आहे. राज्यातील सर्वात पुरातन मंदिर अशी ख्याती असलेल्या चौथ्या शतकातील त्रिविक्रम मंदिराचे रु.2 कोटी 90 लाख निधीतून जतन आणि संवर्धनाचे काम आता अंतिम टप्प्यात आले आहे. तेरणा नदीकाठी घाट बांधणे तसेच नदीवर बॅरेज बांधणे हि कामे प्रस्तावित आहे. तेर येथे सुरु असलेली विकासकामे आणि प्रस्तावित कामे याबाबत मंत्रालय, मुंबई येथे लवकरच बैठक आयोजित करण्यात येणार आहे. याबैठकीत पुरातत्व विभागाचे सहाय्यक संचालक जया वाहाणे, सहाय्यक संचालक अमोल गोटे, शिवाजीराव नाईकवाडी, पद्माकर फंड, दत्ता देवळकर, श्रीमंत फंड, बाळकृष्ण लामतुरे, नवनाथ नाईकवाडी, .भास्कर माळी,विठ्ठल लामतुरे, अजित कदम, सोमनाथ फासे यांच्यासह संबंधित अधिकारी उपस्थित होते.