धाराशिव, (प्रतिनिधी)- येथील मध्यवर्ती जिजाऊ जन्मोत्सव समितीच्या यावर्षीच्या अध्यक्षपदी सौ. प्रणिता पंकज पाटील यांची सर्वानुमते निवड करण्यात आली आहे. राजमाता जिजाऊ यांच्या जयंतीनिमित्त समितीच्या वतीने वर्षभर विविध सामाजिक आणि सांस्कृतिक उपक्रमांचे आयोजन केले जाणार आहे.
शहरात गेल्या 18 वर्षांपासून मध्यवर्ती जिजाऊ जन्मोत्सव समितीच्या माध्यमातून राजमाता जिजाऊ यांचा जन्मोत्सव सोहळा अत्यंत उत्साहात साजरा केला जातो. दरवर्षी 12 जानेवारीपासून (जिजाऊ जयंती) या उपक्रमांची सुरुवात होते आणि वर्षभर विविध कार्यक्रमांची रेलचेल असते. समितीच्या वतीने समाजातील विविध क्षेत्रांत उल्लेखनीय कार्य करणाऱ्या व्यक्तींचा सन्मान करण्यासाठी राजमाता जिजाऊ पुरस्कार, लोकराजा राजर्षी शाहू समाजभूषण पुरस्कार, स्वराज्य संकल्पक शहाजीराजे क्रीडाभूषण पुरस्कार, कर्मवीर मामासाहेब जगदाळे शिक्षकरत्न पुरस्कार प्रदान केले जातात. पुरस्कार वितरणासोबतच समितीच्या वतीने अनेक समाजोपयोगी कार्यक्रम राबवले जातात. यामध्ये प्रामुख्याने मान्यवरांची व्याख्याने, पुस्तक प्रदर्शन, आणि भव्य रक्तदान शिबिरांचा समावेश आहे. तसेच, येथील स्त्री रुग्णालयात रुग्णांना विविध साहित्याचे वाटप करून सामाजिक बांधिलकी जपली जाते. यावर्षी देखील प्रणिता पंकज पाटील यांच्या नेतृत्वाखाली समितीच्या वतीने भव्य आणि समाजोपयोगी कार्यक्रमांच्या माध्यमातून राजमाता जिजाऊ जन्मोत्सव साजरा करण्यात येणार असल्याची माहिती समितीचे सदस्य रोहित बागल यांनी दिली.