विरोधक जुने तेच ते मुद्दे घेवून लढत आहेत- दत्ता कुलकर्णी

धाराशिव (प्रतिनिधी)- न. प. निवडणुकीमध्ये भाजप उमेदवारांचा प्रचार करताना पुढील पाच वर्षाचे विकासाचे नियोजन केले आहे. प्रत्येक भाषणात आम्ही विकासाचे मुद्दे मांडतो. परंतु विरोधक मात्र गेल्या दहा वर्षापासूनचे जे मुद्दे आहेत तेच ते मुद्दे परत मांडत आहेत. त्यामुळे लोकांनी विकासात्मक काम करणाऱ्यांच्या पाठिशी रहावे. असे आवाहन भाजप जिल्हाध्यक्ष दत्ता कुलकर्णी यांनी पत्रकार परिषदेत केले.

रविवार दि. 30 नोव्हेंबर रोजी सायंकाळी झालेल्या या पत्रकार परिषदेमध्ये भाजपचे राज्य कार्यकारिणी सदस्य नितीन काळे, ॲड. नितीन भोसले, माजी नगराध्यक्ष मधुकर तावडे, ॲड. खंडेराव चौरे, युवराज नळे आदी उपस्थित होते. पुढे बोलताना कुलकर्णी यांनी भाजपने आपला विकासात्मक कामाचा जाहीरनामा प्रसिध्द केला आहे. पण विरोधक मांत्र टिकाच करतात असा टोलाही त्यांनी लगावला. 

250 प्रकरणात 200 कोटीचा भ्रष्टाचार

भाजप कार्यकारिण सदस्य नितीन काळे यांनी 2016 ते 2022 पर्यंत धाराशिव नगर पालिकेमध्ये 250 प्रकरणात 200 कोटीचा भ्रष्टाचार झाला आहे असा आरोप करून काळे यांनी धाराशिव नगरपरिषदेचा लेखा परिक्षण अहवाल मांडला आहे. त्यामध्ये शहरात एक-दोन स्वच्छता असताना दरवर्षी 54 लाख रूपये खर्च दाखविला आहे. तर या स्वच्छतागृहास पाणी पुरवठा करण्यासाठी 15 लाख रूपये खर्च दाखविण्यात आला आहे. कोरोना काळात मृतदेहावर अंत्यसंस्कार करण्यासाठी व नाली स्वच्छतेसाठी कोट्यावधी रूपये दाखविण्यात आले आहेत. तर शहरात वृक्षारोपण करण्यात आले आहे असे दाखवून 3 कोटी 50 लाख रूपये खर्च दाखविण्यात आला आहे. जंतुनाशक फवारणी, साहित्य खरेदी, औषध फवारणी यावरही लाखो रूपये खर्च दाखविण्यात आला आहे. न.प. च्या 5 वर्षात 200 कोटीचा भ्रष्टाचार झाला असल्याचा आरोप करत नितीन काळे यांनी भाजपच्या स्वच्छ प्रतिमेच्या उमेदवारांना निवडून देण्याचे आवाहन केले.