धाराशिव (प्रतिनिधी)- जिजामाता शिक्षण प्रसारक मंडळाचे अध्यक्ष मा. व्यंकटराव गुंड यांच्या प्रेरणेने तसेच रूपामाता माध्यमिक व उच्च माध्यमिक विद्यालयाचे मुख्याध्यापक श्री. सुरेश मनसुळे यांच्या मार्गदर्शनाने आयोजित करण्यात आलेली शैक्षणिक सहल उत्साहात आणि शिस्तबद्धतेने पार पडली. सहल नियोजन समितीतील सर्व शिक्षकवृंद यांच्या उत्कृष्ट नियोजनामुळे विद्यार्थ्यांना इतिहास, भूगोल, समुद्रकिनारे, कृषीशास्त्र, समाजसुधारणा व संस्कृतीचे प्रत्यक्ष दर्शन घडले.
या सहलीत विद्यार्थ्यांनी रयत शिक्षण संस्था, महाबळेश्वर, प्रतापगड, रायगड, महाड, पालगड, महर्षी धोंडो केशव कर्वे यांचे जन्मस्थान, मुरुड बीच, हरणे मच्छी मार्केट, डॉ. बाळासाहेब सावंत कोकण कृषी विद्यापीठ, पाली ,महड गणपती, एकविरा आई, कार्ला लेणी, शिरगाव मंदिर व देहु मंदिर अशा विविध महत्त्वाच्या ठिकाणांना भेट दिली.
विद्यार्थ्यांनी रयत शिक्षण संस्था सातारा येथे ग्रामीण भागातील लोकांसाठी उपलब्ध होणाऱ्या व्यापक शैक्षणिक कार्याची माहिती घेतली. महाबळेश्वर येथील निसर्गसौंदर्य, प्रतापगड व रायगड येथील शिवकालीन इतिहास, महाड येथील डॉ. बाबासाहेब आंबेडकरांच्या चवदार तळे सत्याग्रहाचा वारसा, तसेच पूज्य साने गुरुजी यांच्या मूळ गावी त्यांच्या स्मृती निवास स भेट देऊन त्यांनी लिहिलेली खरा तो एकची धर्म ही प्रार्थना म्हटली. स्त्री शिक्षणाचे प्रणेते भारतरत्न महर्षी धोंडो केशव कर्वे यांच्या स्मारकास भेट दिली .त्यांच्या जीवनकार्याची प्रेरणादायी माहिती विद्यार्थ्यांनी जाणून घेतली. मुरुड बीच आणि हर्णे मच्छी मार्केट येथे विद्यार्थ्यांनी सागरी जीवन, मत्स्य व्यवसाय आणि किनारी भागातील अर्थव्यवस्थेचे प्रत्यक्ष निरीक्षण केले.
सहलीतील सर्वात महत्त्वाचा अभ्यासपूर्ण टप्पा होता डॉ. बाळासाहेब सावंत कोकण कृषी विद्यापीठ भेट. येथे विद्यार्थी वर्गाने आधुनिक शेती तंत्रज्ञान, कोकण विद्यापीठाची भव्य इमारत, संशोधन प्रकल्प आणि कृषी शिक्षणाची कार्यपद्धती जाणून घेतली. कृषी क्षेत्रातील प्रगती, फळबाग लागवड, याची विद्यार्थिनी पाहणी केली. धार्मिक व ऐतिहासिक स्थळांमध्ये पाली ,महड गणपती, एकविरा आई, कार्ला लेणी, शिरगाव मंदिर आणि देहू मंदिर यांचा समावेश होता. लेण्यांतील बौद्ध वास्तुकलेने विद्यार्थ्यांना इतिहासाची जाणीव करून दिली.
सहल यशस्वीपणे पूर्ण करण्यासाठी मुख्याध्यापक सुरेश मनसुळे, सहल प्रमुख बापू शेख, सचिन यादव, निमेश गावित, नागनाथ गोरे, प्रा. भीमराव जावळे, प्रा. सचिन सोनकटले, प्रा. श्रीमती गुंड मॅडम, शिक्षकेतर कर्मचारी श्री पवार आर बी, श्री दयानंद थोरात, या सर्वांनी सहल चे काटेकोरपणे नियोजन केले. विद्यार्थ्यांनी या सहलीतून इतिहास, भूगोल, समाजसुधारणा, शेती, पर्यावरण, समुद्रकिनारा व वास्तुकला यांचे बहुपदरी ज्ञान आत्मसात केले. या शैक्षणिक सहलीमुळे विद्यार्थ्यांच्या अभ्यासातच नव्हे तर सर्वांगीण विकासातही भर पडली असून पालक, व्यवस्थापन व ग्रामस्थांकडून शाळेच्या उपक्रमाचे सर्वत्र कौतुक होत आहे.