धाराशिव (प्रतिनिधी)- विरोधकांनी नागरिकांना मुलभूत सुविधा देखील उपलब्ध करून दिल्या नाहीत अशी घणाघाती टिका भाजपचे आमदार राणाजगजितसिंह पाटील यांनी प्रचार सभेत केली. धाराशिव नगर परिषद निवडणूक 2025 च्या अनुषंगाने भाजपा नगराध्यक्ष पदाच्या उमेदवार सौ. नेहाताई राहुल काकडे तसेच प्रभाग क्रमांक 4 मधील नगरसेवक पदाचे उमेदवार सौ. राणीताई दाजीआप्पा पवार आणि अभिजीत काकडे यांच्या प्रचारार्थ काकडे प्लॉट येथे जाहीर सभा संपन्न झाली.
भारतीय जनता पक्षाच्या कार्यकर्त्यांनी शहरामध्ये घरोघरी जाऊन, नागरिकांशी बोलून, त्यांच्या अडचणी यापूर्वीच समजून घेतल्या आहेत. नागरिकांच्या या अडचणी, समस्यांवर काम करण्याचा निर्णय आपण घेतला आहे. त्यातीलच बाबींना आपण वचननाम्यात प्राधान्याने स्थान दिले आहे. वचननामामध्ये त्यांचा समावेश करण्यात आलेला आहे. तसेच नागरिकांनी यापुढेही आणखी काही सूचना किंवा समस्या मांडल्या तर त्यावरही तत्परतेने काम करण्याचा आपला निर्धार आहे. धाराशिव नगरपालिकेवर यापूर्वी सत्ता भोगणाऱ्या विरोधकांमुळे शहरवासीयांना आज मुलभूत सुविधा मिळत नाहीत, ही फार दुर्दैवाची गोष्ट आहे. देशात आणि राज्यात विकासाच्या माध्यमातून जनसेवा आणि जनतेचा महायुतीवर असलेला विश्वास सार्थ ठरविण्यासाठी भाजपाकडून शहरविकासासाठी पंचसूत्री राबविली जाणार आहे.
धाराशिव शहरवासीयांना अपेक्षित असे लोकप्रतिनिधी देण्याचा संकल्प महायुतीने केलेला आहे. आजवर अनेक गैरसोयींना सामोरे जाणाऱ्या शहरवासीयांना आता यापुढे त्रास होवू नये यासाठी चांगले, सुशिक्षित उमेदवार महायुतीने दिलेले आहेत. पारदर्शक व भ्रष्टाचारमुक्त प्रशासन, 24 तास पाणी पुरवठा, धुळमुक्त आणि खड्डेमुक्त प्रशस्त रस्ते, दररोज कचरा संकलन, विघटन आणि त्यावर प्रक्रिया, शिक्षण, आरोग्य व रोजगार निर्मितीवर भर या विकासाच्या पंचसूत्रीतून जनसेवा करण्याची संधी महायुतीला शहरवासीयांनी देणे आवश्यक आहे. यावेळी दत्ताभाऊ कुलकर्णी, नितीन काळे, नितीन भोसले तसेच प्रभागातील ज्येष्ठ नागरिक, महिला भगिनी, तरुण बांधव उपस्थित होते.