तुळजापूर (प्रतिनिधी)- तुळजापूर सोलापूर रस्त्यावर माळुंब्रा गावाजवळील हाँटल देवराज समोर शनिवारी (दि.11 ऑक्टोबर) दुपारी लातुरहुन तुळजापूरमार्ग सोलापूरच्या दिशेने जाणाऱ्या शर्मा ट्रॅव्हल्स (एमएच-26 सीएच-1830) या प्रवासी बसला अचानक आग लागली. सुदैवाने यात प्रवासी नसल्याने मोठा अनर्थ टळला. सदरील घटना स्थळी तामलवाडी पोलिस स्टेशनचे पोलिस अधिकारी ठाकुर यांनी घटनास्थळी येवुन अग्नीशमन वाहन मदतीने आग विझवली यावेळी तात्काळ महामार्ग वरील वाहतुक सुरुळीत केल्याने प्रवाशांना दिलासा मिळाला.
देवराज हॉटेलसमोर जात असताना बसच्या ब्रेक लाइनरमध्ये तांत्रिक बिघाड झाल्याने इंजिन व टायरमधून अचानक धूर निघून आग लागली. चालक परमेश्वर शहाजी केंद्रे (रा. वागदरवाडी, ता. लोहा, जि. नांदेड) व क्लीनर रामेश्वर केशव तुपेकर रा फुलवळ जिल्हा नांदेड हे बाहेर आल्याने ते सुखरुप आहेत.
दरम्यान, बसमधून येणाऱ्या फटफट आवाजामुळे परिसरात काही काळ भीतीचे वातावरण निर्माण झाले. स्थानिक नागरिकांनी तत्काळ घटनास्थळी धाव घेत मदतकार्य सुरू केले. घटनेची माहिती मिळताच तुळजापूर नगरपरिषदेच्या अग्निशामक दलाची गाडीने तात्काळ घटनास्थळी दाखल झाली. आग विझवण्यासाठी प्रयत्न युद्धपातळीवर करून आग विझवली.
या आगीत कोणतीही जीवितहानी झाली नसली, तरी बसचे मोठे आर्थिक नुकसान झाले आहे. ब्रेक लाइनर जाम झाल्याने टायर घासून गरम झाले आणि त्यातूनच आग लागल्याची प्राथमिक माहिती मिळाली आहे. घटनास्थळी तुळजापूर पोलीस ठाण्याचे अधिकारी व कर्मचारी, तसेच तामलवाडी पोलीस ठाण्याचे सहाय्यक पोलीस निरीक्षक गोकुळ ठाकूर यांच्या मार्गदर्शनाखाली पोलीस पथकाने तात्काळ धाव घेत परिस्थिती नियंत्रणात आणली असून पुढील तपास सुरू आहे.