तुळजापूर (प्रतिनिधी)- जिल्हा पोलीस अधीक्षक धाराशिव यांच्या आदेशानुसार, सहाय्यक पोलीस निरीक्षक सुरेश कचरु नरवडे, पोलीस ठाणे तुळजापूर, यांना तत्काळ प्रभावाने निलंबित करण्यात आले आहे.
पोलीस ठाणे तुळजापूर येथील गुन्हा क्रमांक 93/2025, कलम 103(1), 3(5) भा.न्या.सं. अंतर्गत दाखल प्रकरणात निर्धारित 90 दिवसांच्या कालावधीत चार्जशीट सादर करण्यात आलेली नाही, अशी बाब तपासात आढळली आहे. या निष्काळजीपणामुळे कर्तव्यात गंभीर दुर्लक्ष झाल्याचे निदर्शनास आले असून, ती बाब त्यांच्या कर्तव्यपालनातील हलगर्जीपणाचे द्योतक असल्याचे आदेशात नमूद करण्यात आले आहे. पोलीस विभागात जबाबदारी आणि शिस्त यांना सर्वोच्च प्राधान्य दिले जाणार असून, अशा प्रकारच्या निष्काळजीपणाबाबत कोणतीही सहनशीलता दाखविली जाणार नाही, असे जिल्हा पोलीस अधीक्षकांनी स्पष्ट केले आहे.