धाराशिव (प्रतिनिधी)- धाराशिव शहरातील नागरिकांना मूलभूत सुविधा पुरविण्यात नगर परिषद प्रशासन व राज्य शासन पूर्णपणे अपयशी ठरल्याचा आरोप करत शहर काँग्रेसतर्फे आज नगर परिषद गेटसमोर धरणे आंदोलन करण्यात आले. शहरातील अस्वच्छता, भटक्या कुत्र्यांचा व जनावरांचा त्रास, रस्त्यांची दयनीय अवस्था, पाणीपुरवठ्याची अडचण, बाजारातील असुविधा, पथदिवे बंद पडणे, कचरा डेपोची दुर्गंधी, तसेच भुयारी गटार योजनेतील निकृष्ट कामे या प्रश्नांवर जोरदार घोषणाबाजी करीत काँग्रेसने प्रशासनाला जाब विचारला. आंदोलनानंतर नगरपरिषद मुख्याधिकारी नीता अंधारे तसेच जिल्हाधिकारी यांना मागण्यांचे निवेदन देण्यात आले. या आंदोलनाला जिल्हाध्यक्ष धीरज पाटील तसेच प्रदेश सचिव पांडुरंग कुंभार यांनी उपस्थित राहून समर्थन दिले.
शहरात स्वच्छता नियमित व योग्य प्रकारे करण्यात यावी. शहरातील नागरिकांना विशेषतः महिला, ज्येष्ठ नागरिक व लहान मुले यांना भटक्या कुत्र्यांच्या झुंडीना सामोरे जावे लागत आहे. शहरातील रस्ते व नाल्यांची तात्काळ दुरुस्ती व नूतनीकरण करण्यात यावे. भोगावती नदीचे स्वच्छता व सौंदर्यकरण यासाठी कालबध्द कार्यक्रम आखून त्याप्रमाणे नियोजन करण्यात यावे. शहरातील उद्यानांची तातडीने दुरुस्ती तसेच सुशोभीकरण करण्यात यावे आदी मागण्या मांडण्यात आल्या. यावेळी जोरदार घोषणाबाजीने नगर परिषद परिसर दणाणून गेला होता.
आंदोलनात काँग्रेस नेते विश्वास शिंदे, प्रदेश सचिव डॉ.स्मिता शहापूरकर, वरिष्ठ उपाध्यक्ष सय्यद खलील, उपाध्यक्ष प्रशांत पाटील, सय्यद नादेरुल्लाह हुसेनी, मुनीर कुरेशी, शहराध्यक्ष अग्निवेश शिंदे, राजाभाऊ शेरखाने, सिद्धार्थ बनसोडे, उमेश राजेनिंबाळकर, धनंजय राऊत, सदर उस्मान कुरेशी, अंगुल बनसोडे, विजय मुद्दे, जावेद काझी, अशोक बनसोडे, सरफराज काझी, अभिषेक बागल, आयुब पठाण, शहाजी मुंडे, प्रभाकर लोंढे यांच्यासह कार्यकर्ते सहभागी झाले होते. शहरातील मूलभूत सुविधा प्रश्नांवर प्रशासनाने तातडीने उपाययोजना न केल्यास उग्र आंदोलन करण्यात येईल असा इशारा काँग्रेसने दिला आहे.