धाराशिव (प्रतिनिधी)- महाराष्ट्र शासनाच्या शालेय शिक्षण व क्रीडा विभागामार्फत राबविण्यात येणाऱ्या नवभारत साक्षरता योजनेच्या प्रभावी अंमलबजावणीसाठी जिल्हास्तरीय कार्यकारी समितीची आढावा बैठक जिल्हा परिषदेचे मुख्य कार्यकारी अधिकारी तथा अध्यक्ष कार्यकारी समिती डॉ.मैनाक घोष यांच्या अध्यक्षतेखाली जिल्हा परिषद, धाराशिव येथे नुकतीच पार पडली.
या बैठकीत शिक्षणाधिकारी (योजना) तसेच कार्यकारी समितीचे सदस्य सचिव नागेश मापारी यांनी योजनेची सविस्तर माहिती दिली आणि 2025-26 या आर्थिक वर्षात जिल्ह्यासाठी एकूण 11 हजार 284 निरक्षर नागरिकांना साक्षर करण्याचे उद्दिष्ट असल्याचे सांगितले.
या योजनेअंतर्गत 15 ते 90 वयोगटातील निरक्षर नागरिकांना साक्षर बनविणे हे मुख्य उद्दिष्ट असून, जिल्ह्यातील सर्व तालुक्यांमध्ये उद्दिष्टांचे वाटप करण्यात आले आहे.तालुकानिहाय उद्दिष्ट पुढीलप्रमाणे आहे.धाराशिव,तुळजापूर,उमरगा प्रत्येकी 1,750,लोहारा 1,050, कळंब 1,400,वाशी 784,भूम 1,400,परंडा 1,400 असे निश्चित केले आहे.
यामध्ये पुरुष निरक्षरांची संख्या 4,514 तर महिला निरक्षरांची संख्या 6,770 इतकी असून त्यांना साक्षर बनविण्याचे उद्दिष्ट निर्धारित करण्यात आले आहे.
बैठकीस सर्व तालुक्यांचे गटशिक्षणाधिकारी उपस्थित होते. बैठकीत डॉ.मैनाक घोष यांनी योजनेच्या अंमलबजावणीचा आढावा घेत सर्व गटशिक्षणाधिकाऱ्यांना दिलेल्या उद्दिष्टांची पूर्तता लवकरात लवकर करण्याचे निर्देश दिले.त्यांनी निरक्षर व्यक्तींना साक्षर करण्यासाठी ग्रामस्तरावर जनजागृती मोहीम राबवण्याचे व नागरिकांना या उपक्रमात सहभागी करून घेण्याचे आवाहन केले.या बैठकीच्या माध्यमातून नवभारत साक्षरता योजनेच्या अंमलबजावणीत धाराशिव जिल्हा अधिक सक्षमपणे पुढे येणार आहे.