भूम (प्रतिनिधी)- परंडा विधानसभा मतदारसंघात महाविकास आघाडीत बिघाडी झाली असून, राष्ट्रवादी शरद पवार गटाकडून एबी फॉर्मसह राहुल मोटे यांनी उमेदवा अर्ज दाखल करीत बंडाचे निशाण फडकविले आहे. मोटे यांनी भूम तहसीलदार कार्यालय जावून अर्ज दाखल केला. त्यावेळी पदाधिकारी कार्यकर्ते हजर होते.
शिवसेना उध्दव बाळासाहेब ठाकरे गटाने भूम, परंडा, वाशी मतदार संघातून माजी आमदार कै. ज्ञानेश्वर पाटील यांचे पुत्र रणजीत पाटील यांना उमेदवारी घोषित केली असून, एबी फॉर्म दिला आहे. पक्षप्रमुख उध्दव ठाकरे यांनी त्यांना एबी फॉर्म दिला असून, पाटील हे सोमवारी उमेदवारी अर्ज दाखल करणार आहेत. महाविकास आघाडीचा घटक असलेल्या शिवसेनेने उमेदवारी जाहीर केल्यानंतर राष्ट्रवादी शरद पवार गटाचे माजी आमदार राहुल मोटे यांनी आज उमेदवारी अर्ज पक्षाच्या एबी फॉर्मसह दाखल केला आहे. या मतदासंघात महाविकास आघाडीत बिघाडी झाली असून, बंडखोरीमुळे डोकेदुखी वाढली आहे. बंडखोरी शमणार की मैत्रीपूर्ण लढत होणार याकडे लक्ष लागले आहे.
2019 च्या विधानसभा निवडणुकीत परंडा मतदारसंघात पालकमंत्री तथा आरोग्यमंत्री डॉ. तानाजी सावंत हे विक्रमी 32 हजार 902 मतांनी विजयी झाले होते. त्यांनी सलग 3 टर्म आमदार राहिलेल्या राष्ट्रवादीचे राहुल मोटे यांचा पराभव केला होता. मोटे यांना 73 हजार 772 मते पडली होती. तर सावंत यांना 1 लाख 6 हजार 674 मते पडली होती.