धाराशिव (प्रतिनिधी)- दिनांक 28 सप्टेंबर ते 2 ऑक्टोबर या कालावधीत झारखंड येथे होणाऱ्या किशोर, किशोरी राष्ट्रीय अजिंक्यपद खो-खो स्पर्धेसाठी धाराशिव येथील जिल्हा शिक्षण व प्रशिक्षण संस्था धाराशिव या ठिकाणी महाराष्ट्र खो खो संघाच्या निवड चाचणीचे आयोजन करण्यात आले होते. यामध्ये महाराष्ट्रातील सर्व संघ सहभागी झाले होते. त्यामधून राष्ट्रीय खो खो स्पर्धेसाठी महाराष्ट्राचा किशोर, किशोरी दोन्ही संघ महाराष्ट्र खो-खो असोसिएशनचे सचिव प्रा. डॉ. चंद्रजीत जाधव यांनी जाहीर केले.
यामध्ये धाराशिव जिल्ह्यातील श्रीपतराव भोसले हायस्कूल येथे शिक्षण घेत असलेल्या भिमसिंग वसावे, सुरेश वसावे व प्रफुल वसावे यांची किशोर संघात तर सिद्धी भोसले, ईश्वरी सुतार, मुग्धा सातपुते व आरोही पाटील यांची महाराष्ट्र खो-खो संघात निवड झाली आहे. अभिनंदनीय बाब म्हणजे सिद्धी भोसले हिची महाराष्ट्र संघाच्या कर्णधार पदी निवड झाली आहे. वरील निवड झालेल्या सर्व खेळाडूंना राष्ट्रीय क्रीडा प्रशिक्षक प्रवीण बागल, प्रभाकर काळे,अभिजीत पाटील यांचे मार्गदर्शन लाभले आहे. या निवडीबद्दल आदर्श शिक्षण मंडळाचे अध्यक्ष सुधीर पाटील, महाराष्ट्र खो खो संघटनेचे सचिव चंद्रजीत जाधव, एएसपीएमचे मुख्य कार्यकारी अधिकारी आदित्य सुधीर पाटील, प्रदीप घोणे, अभय इंगळे यांनी अभिनंदन केले.