धाराशिव (प्रतिनिधी)- येथे 65 व्या महाराष्ट्र केसरीचा थरार अनुभवण्यासाठी आबालवृद्धांची क्रीडा संकुलावर प्रचंड गर्दी होत आहे संपूर्ण महाराष्ट्रालाच यावर्षीचा 'महाराष्ट्र केसरी ' कोण याची उत्सुकता लागली असून प्रतिक्षा शिगेला पोहोचली आहे.
आजच्या प्रमुख लढती उमरगा -लोहारा तालुक्याचे लोकप्रिय आमदार ज्ञानराज चौगुले व आयोजक सुधीर पाटील यांच्या हस्ते लावण्यात आल्या. तर उभयांतांच्या हस्ते क्रीडा ज्योतीचे प्रज्वलन करण्यात आले. या स्पर्धेचे मुख्य आयोजक सुधीर पाटील, कार्यवाहक युवा उद्योजक युवा नेते अभिराम पाटील यांनी स्पर्धेसाठी येणाऱ्या मान्यवरांचा सत्कार केला. या कुस्तीच्या कुंभ मेळ्यामध्ये आजी - माजी नामवंत अशा महान मल्लांची उपस्थिती लक्षणीय होती.
यावेळी भाजप नेते अनिल काळे, विनोद गपाट, युवराज नळे, प्रविण पाठक, मिडिया भाजपा सोशेल मिडिया प्रमुख धनजंय रणदिवे, डॉ.गोविंद कोकाटे, श्रीकांत साखरे, विक्रम पाटील, बिभिषण पाटील, डी.जी. मळेकर, महाराष्ट्र केसरी पैलवान मगर, वामनराव गाते, दीपक जाधव, अर्जून पुरस्कार प्राप्त काकासाहेब पवार, महाराष्ट्र उपकेसरी राजाभाऊ मोहोळ, संजय दुधगावकर, उपनिरिक्षक बांगर, पैलवान राजू मराडकर व अनेक मान्यवर उपस्थित होते. यासर्व मान्यवरांचे आयोजकांकडून सत्कार करण्यात आले.
आज झालेल्या 65 व्या महाराष्ट्र केसरी गटातील चित्तथरारक कुस्त्यामध्ये माती विभागात श्रीमंत भोसले, कोल्हापूर विरुद्ध गणेश जगताप हिंगोली तर मतीन शेख, छ संभाजी नगर विरुद्ध तानाजी झुंजुर्के, अमरावती आणि साकेत यादव, पुणे शहर विरुद्ध महिंद्र गायकवाड, पुणे शहर तसेच हर्ष वर्धन सदगीर, नाशिक विरुद्ध वेताळ शेळके, गोंदिया यांच्यामध्ये कुस्त्या झाल्या.
महाराष्ट्र केसरी गादी विभागात उपांत्यपूर्व फेरीत शिवराज राक्षे विरुद्ध सारंग सोनटक्के यांच्या लढतीत नांदेडचा शिवराज राक्षे विजयी तर बालारफिक शेख विरुद्ध संग्राम पाटील लढतीत कोल्हापूरचा संग्राम पाटील विजयी व हर्षद कोकाटे विरुद्ध वैभव रासकर लढत झाली तर तुषार दुबे पुणे जिल्हा विरुद्ध पृथ्वीराज मोहोळ मुंबई उपनगर लढतीत पृथ्वीराज मोहोळ विजयी झाला. तर 92 वजन गादी गटात सोलापूर जिल्हयातील बार्शीचा रामा कांबळे विरुद्ध पुणे शहराचा अभिजित भोईर यांच्या लढतीत रामा कांबळे विजयी झाला. हा सुवर्ण पदक व बुलेट गाडीचा विजेता ठरला तर अभिजित भोईर रजत पदक ठरला. सर्वच मल्ल यांच्यात कडवी झुंज कुस्ती प्रेमींना अनुभवता आली.