प्रतिनिधी /उस्मानाबाद -
एकनाथ शिंदे यांच्यासोबत जाऊन बंडखोरी केलेल्या शिवसेनेच्या आमदारांचा पहिला फोटो समोर आला असून यात उस्मानाबाद जिल्ह्यातील शिवसेनेचे उपनेते, माजी मंत्री आमदार डॉ तानाजीराव सावंत व ज्ञानराज चौगुले यांचा समावेश आहे. सावंत हे एकनाथ शिंदे यांच्या सोबत पहिल्या रांगेत बसले आहेत तर चौगुले हे शिंदे यांच्या मागे उभे आहेत. उस्मानाबाद जिल्ह्यातील शिवसेनेच्या 3 पैकी 2 आमदार हे नॉट रिचेबल होते ते आता शिंदे सोबत बंडखोरी करुन सोबत असल्याचे या फोटोतून समोर आले आहे तर आमदार कैलास पाटील हे या गटाच्या तावडीतून सुटत मातोश्रीवर दाखल झाले आहेत. या फोटोत 32 आमदारांचा समावेश असून त्यात राज्यमंत्री बच्चू कडू हे शिंदे याच्या शेजारी बसले आहेत.
दरम्यान सुरत येथील हॉटेलमध्ये आमदार नितीन देशमुख यांच्यासह तानाजीराव सावंत यांना धक्काबुक्की व मारहाण झाल्याची सूत्रांची माहिती आहे. हा प्रकार नेमका कशामुळे झाला व कोणी केला याची सविस्तर माहिती अद्याप मिळू शकली नाही मात्र सेनेच्या काही आमदारांना तिथे हॉटेलमध्ये गुंडाकडून जबरदस्ती, मारहाण केल्याचा आरोप आमदारच्या निकटवर्तीयकडून होत असून त्याला शिवसेना खासदार संजय राऊत यांनी सुद्धा पुष्टी दिली आहे. नेमके हे आमदार स्वतः गेले की बळजबरीने नेले की तिथे गेल्यावर बिनसल्याने वादातून हे घडले हे नंतर स्पष्ट होणार आहे.