उस्मानाबाद/ प्रतिनिधी- ग्रामपंचायत निवडणूकीत त्रास देण्याच्या हेतुने विरोधकांनी आपल्या विरोधात गटविकास अधिकार्‍यांपासून विभागीय आयुक्तांपर्यंत तथ्यहिन व खोटी तक्रार दाखल केली. मागील पाच वर्षाच्या कार्यकाळात केवळ सहा महिने आपल्याकडे सरपंचपद होते. या काळात जी विकासकामे झाली, त्यापैकी एकाही कामात अनियमितता किंवा भ्रष्टाचार झालेला नाही. त्यामुळे कोणत्याही प्रकारच्या चौकशींना आपण सामोरे जाणार असून गावात सामाजिक तेढ निर्माण करू पाहणार्‍या समाजकंटकांवर ग्रामस्थांनी विश्वास ठेऊ नये, असे आवाहन बेंबळी ग्रामपंचायतीचे माजी सरपंच सत्तार शेख यांनी प्रसिध्दीपत्रकाद्वारे केले आहे.
ग्रामपंचायतीच्या मागील पाच वर्षांच्या कार्यकाळात सहा महिने आपल्याकडे प्रभारी सरपंचपद होते. उर्वरित काळात आपण उपसरपंच, सदस्य होतो. आपल्या कार्यकाळात झालेली सर्व विकासकामे ही ग्रामपंचायतीच्या मासिक बैठकीतील ठरावानुसार, तसेच जिल्हा परिषद व पंचायत समितीच्या संबंधित वरीष्ठ अधिकार्‍यांच्या तांत्रिक मान्यता व परवानगीनेच झाली आहेत. विरोधकांनी विभागीय आयुक्तांकडे वित्त आयोगाच्या निधीतून झालेल्या विविध कामांमध्ये एक कोटी 35 लाख रूपयांच्या निधी खर्चात अनियमितता झाल्याचा खोटा आरोप केला आहे.
वास्तविक पाहता, वित्त आयोगातून दीड कोटींचा निधी ग्रामपंचायतीला मिळालेला नाही. तरीही वित्त आयोगातून झालेल्या सर्व कामांसाठी तक्रारदाराच्या पत्नी या स्वतः ग्रामपंचायत सदस्य या नात्याने मासिक बैठकीला हजर होत्या. त्यांनीही विविध कामांच्या ठरावाला संमती देत त्यावर स्वाक्षरी केली आहे. मात्र विरोधाला विरोध करायचा म्हणून ग्रामपंचायत निवडणुकीत त्रास देण्याच्या हेतुने विरोधकांनी विभागीय आयुक्त आणि पंचायत समिती कार्यालयात तक्रारी दाखल केल्या आहेत. जिल्हा परिषदेच्या मुख्य कार्यकारी अधिकार्‍यांना विभागीय आयुक्तांकडून सरपंचाची सुनावणी घेण्याचे आदेश आल्याचे समजले आहे. गावात झालेली विकासकामे ही नियमाप्रमाणे व सर्व निकषांना अधीन राहूनच झालेली आहेत. त्याबाबतचे सर्व पुरावे आपल्याकडे आहेत. त्यामुळे आपण कोणत्याही सुनावणीला सक्षमपणे सामोरे जाणार आहे. विरोधकांच्या खोट्या तक्रारींवर ग्रामस्थांनी गावाच्या विकासासाठी ग्रामपंचायत निवडणुकीत सहकार्य करावे व समाजात तेढ निर्माण करू पाहणार्‍या समाजकंटकांवर विश्वास ठेऊ नये, असेही माजी सरपंच सत्तार शेख यांनी प्रसिध्दीपत्रकात म्हटले आहे.