जिल्ह्यात झालेल्या वादळी पावसाने शेतकऱ्यांचे मोठ्या प्रमाणात नुकसान झाले आहे. आपल्या हातात राज्याच्या तिजोरीच्या चाव्या असल्याने गेल्यावर्षी औरंगाबाद येथे आपण मागणी केल्याप्रमाणे जिल्ह्यातील शेतकऱ्यांना नुकसानीपोटी तातडीने हेक्टरी २५ हजार रुपये द्या, असे आवाहन आमदार राणाजगजितसिंह पाटील यांनी मुख्यमंत्री उद्धव ठाकरे यांना केले आहे.
आमदार राणा पाटील यांनी अनेक गावांत जाऊन पाहणी केली. काढणीला आलेले व काढून ठेवलेले सोयाबीन पाण्याखाली गेले असून ऊस व तूर ही नगदी पिके आडवी झाली आहेत. अनेक ठिकाणी घरांची पडझड झाली आहे व रस्ते, पूल, बंधारे वाहून गेले आहेत. वीज वितरण व्यवस्थेचेही नुकसान झाले आहे. नुकसानीची व्याप्ती पाहता यावर चर्चा न करता सरसकट मदत देणे योग्य राहील, असे आमदार पाटील यांनी म्हटले आहे. गेल्या वर्षी सातारा, सांगली कोल्हापूर जिल्ह्यात महापूर आल्याने शेतीचे मोठ्या प्रमाणात नुकसान झाले होते. तत्कालीन मुख्यमंत्री देवेंद्र फडणवीस यांच्या सरकारने अतिवृष्टीमुळे नुकसान झालेल्या पूरबाधित शेतकऱ्यांनी घेतलेले सर्व पिकांसाठीचे २०१८-१९ आणि २०१९-२० या दोन वर्षांसाठीचे १ हेक्टरपर्यंतचे बँक कर्ज माफ केले होते. तसेच नुकसानभरपाई म्हणून स्थायी आदेशाच्या पलीकडे जाऊन दुपटीने नगदी स्वरुपात मदत केली होती. काही मंत्री सरकारकडे पैसा नसल्याची विधानं करत आहेत. परंतु सरकारला महाराष्ट्राच्या वार्षिक उत्पन्नाच्या (जीएसडीपीच्या) ५% रक्कम कर्ज म्हणून उपलब्ध होऊ शकते जी की अधिकचे १ लाख ६० हजार कोटी इतकी आहे. त्यामुळे पैसा नसेल तर प्रचलित पद्धतीने कर्ज काढून मदत करावी असे आमदार पाटील यांनी म्हटले आहे. गेल्या वर्षी ऑक्टोबर महिन्यात अवकाळी पावसाने राज्यात अनेक ठिकाणी असेच नुकसान केले होते. तेव्हा औरंगाबाद येथे नुकसानीची पाहणी केल्यावर आपण सरकारला कोणत्याही अटी न ठेवता तातडीने हेक्टरी २५₹ हजाराची मदत देण्याची मागणी केली होती. आता मुख्यमंत्री या नात्याने राज्याच्या तिजोरीच्या चाव्या आपल्या हाती आहेत. त्यामुळे आपण शेतकऱ्यांच्या हितासाठी गेल्यावर्षी केलेल्या न्याय मागणीची पूर्तता करुन “जे बोलतो ते करून दाखवतो’ हा आपला बाणा सत्यात उतरवा, असे आवाहन आमदार पाटील यांनी मुख्यमंत्री ठाकरे यांना केले. कोरडवाहू पिकांना सरसकट हेक्टरी २५ हजार तर बागायती व फळपिकांना हेक्टरी ५० हजाराची मदत १५ दिवसांच्या आता द्या. अतिवृष्टीमुळे बाधित शेतकऱ्यांनी घेतलेले सर्व पिकांसाठीचे एक हेक्टरपर्यंतचे कर्ज माफ करावे. अतिवृष्टीमुळे पडझड झालेली घरे, रस्ते, पुल व बंधाऱ्यांच्या दुरुस्तीसाठी आराखडा तयार करुन त्यासाठी विशेष निधी उपलब्ध करुन याची कालबद्ध अंमलबजावणीसाठी वरिष्ठ अधिकारी नेमा, आदी मागण्या आमदार राणा पाटील यांनी केल्या आहेत.