कोरोनाच्या रुग्ण संख्येत दिवसेंदिवस वाढ होत असून नागरिकांनीदेखील स्वतः सतर्क राहून प्रशासनाला सहकार्य करीत आपल्या आरोग्याची काळजी घेणे आवश्यक आहे.”गेल्या काही दिवसांमध्ये तेर येथे कोविड-१९ बाधीत रुग्णांमध्ये सातत्याने वाढ होत असून सतर्कतेसाठी ७ दिवसांपुर्वी गावचे सरपंच, सर्व ग्रामपंचायत सदस्य, आरोग्य यंत्रणा व संबंधित प्रशासनास उपाययोजना करण्यासंदर्भात निर्देश दिले होते.त्याचा आढावा घेण्यासाठी तेर या गावी भेट दिली. आरोग्य यंत्रणेचे कर्मचारी, आशा सेविका, ग्रामपंचायत सदस्य, प्रशासनातील सर्व अधिकारी यांच्याशी चर्चा करून परिस्थितीचा आढावा घेतला. या ठिकाणी आतापर्यंत एकुण १४५ कोविड संशयीत रुग्ण आढळलेले असुन, त्यातील ९८ रुग्ण हे कोरोना बाधीत आहेत व ५ जणांचा कोरोनामुळे मृत्यु झालेला आहे.
या सर्व बाबींचा गांभीर्याने विचार येथील ६ वार्डांमध्ये प्रत्येकी ७ सदस्यीय समिती स्थापन करण्याचे निर्देश दिले. ज्यामध्ये वार्डातील ३ ग्रामपंचायत सदस्य, २ आशा सेविका व २ समाजसेवक असतील. अशा प्रकारे एक टिम तयार करुन सदरील समितीने वार्डामधील प्रत्येक घरात जाऊन कुटुंबियांची सर्व माहिती संकलीत करणे, सदर कुटुंबियांची कोरोना चाचणी घेणे याबाबत सूचना दिल्या. तसेच समितीने विशेषत: जे लोक तोंडाला मास्क लावत नाहीत अशांवर दंडात्मक कार्यवाही करणे, सामाजिक अंतर ठेवणे, अनावश्यक बाहेर फिरणाऱ्यांवर नजर ठेवून त्यांच्यावर दंडात्मक कार्यवाही करणे याबाबत सूचना दिल्या आहेत. सदरील कार्यवाही प्रभावीपणे राबविण्यासाठी पोलीस खात्याने सहकार्य करावे यासाठी विभागीय पोलीस अधिकारी श्री.पाटील यांच्याशी भ्रमणध्वनीद्वारे संपर्क करुन तेर येथे पोलीस कर्मचाऱ्यांमध्ये वाढ करण्यासंदर्भात सुचना केल्या.
त्याप्रसंगी जि.प.अध्यक्षा सौ.अस्मिता कांबळे, जि.प.बांधकाम सभापती श्री.दत्तात्रय देवळकर, पंचायत समितीचे उपसभापती श्री.संजयकाका लोखंडे, उपविभागीय अधिकारी श्री.रोडगे, तहसिलदार श्री.माळी, गटविकास अधिकारी श्रीमती दिवाणे, जिल्हा आरोग्य अधिकारी श्री.वडगावे, सहाय्यक पोलीस निरीक्षक श्री.बनसोडे, आशा सेविका, सर्व ग्रामपंचायत सदस्य व अंगणवाडी सेविकांची उपस्थिती होती.