कोरोना संसर्गास अटकाव व्हावा या उद्देशाने जिल्हाभरात तपासणी नाके, प्रतिबंधित क्षेत्रे, रुग्णालयाच्या ठिकाणी बंदोबस्तावर असलेल्या पोलिस कर्मचारी व गृहरक्षक दलाच्या जवानांची रॅपिड अँटिजेन टेस्ट करण्यात येत आहे.
पोलिस दलाचे अधिकारी, कर्मचारी व गृहरक्षक दलाचे जवान अहोरात्र तैनात आहेत. त्यांच्या आरोग्याची काळजी घेण्याच्या उद्देशाने सर्व पोलिस ठाणे व शाखा, पोलिस कार्यालयात असणाऱ्या सर्व पोलिसांची रॅपिड ॲन्टीजेन तपासणी करण्यात येत आहे. यात कोविड- १९ बाधीत आढळल्यास त्यांच्या उपचाराकरीता तसेच क्वारंटाईन कक्षाकरीता तुळजापूर येथील साप्ताहिक बाजार परिसरात असणाऱ्या मंदीर संस्थानच्या भक्त निवासाच्या ईमारतीमधील तिसरा मजला राखीव ठेवण्यात आला आहे. तेथे त्यांना आवश्यक सुविधा पुरवण्याकरीता वैद्यकीय अधिकारी, पोलिस कर्मचारी नेमण्यात आले आहेत. आजपर्यंत उस्मानाबाद पोलिस दलातील दोन अधिकारी, १० पोलिस कर्मचारी व दोन पोलिस कुटूंब सदस्य कोविडमुक्त झाले असून एक पोलीस कर्मचारी मृत झाला आहे. सध्या तीन पोलिस अधिकारी, ३१ पोलिस कर्मचारी, सहा कुटूंबीय व दोन गृहरक्षक दलाचे जवान उपचार घेत आहेत.