उस्मानाबाद/ प्रतिनिधी
|
गरीब कुटुंबातील व्यक्तींसाठी कोरोनाच्या पार्श्वभूमीवर प्रत्येकी दोन मास्क, सॅनिटायझर व साबण असे कीट व सोबत एक माहितीपत्रक देण्याचा निर्णय तुळजापूरचे आमदार राणाजगजितसिंह पाटील यांनी घेतला आहे. यासाठी सुरुवातीला ५ लाख रुपये उपलब्ध केले असून, सुमारे १ लाख मास्कचे उत्पादन सुरू करण्यात आल्याची माहिती आ. पाटील यांनी दिली आहे.
हातांची स्वच्छता राखणे व बाहेर पडताना तोंडाला मास्क लावणे आवश्यक आहे. मात्र, आवश्यक असणारे मास्क, सॅनिटायझर व साबण या वस्तू विकत घेणे काही लोकांना शक्य होत नाही. त्यामुळे समाजातील अशा घटकांचा विचार करून आपण अनेकांशी विचारविनिमय करून हा निर्णय घेतला असून पहिल्या टप्प्यात उस्मानाबाद, तुळजापूर व कळंब तालुक्यात हा उपक्रम राबविण्यात येणार आहे. रोटरी क्लबची या कामी मदत घेतली जाणार असून जिल्हा प्रशासनाच्या माध्यमातून हे स्वच्छता किट देण्यात येणार आहे. याकामी सुरुवातीला ५ लाखांचा निधी उपलब्ध केला असल्याचे आमदार पाटील यांनी सांगितले आहे.
या उपक्रमाला मोठ्या संख्येने मास्क लागणार असल्याने उस्मानाबाद येथे मास्कचे उत्पादन चालू केले असून जिल्ह्यातील वस्त्र निर्मिती करणाऱ्या संस्थांना यात सहभागी करून घेण्यात येणार आहे व याबाबत चर्चा देखील झाली आहे. सॅनिटायझरची निर्मिती स्थानिक पातळीवर होण्यासाठी जिल्ह्यातील काही साखर कारखाना प्रशासन व संबंधित खात्याचे मंत्री व वरिष्ठ अधिकाऱ्यांशी आपण बोललो असून लवकरच सॅनिटायझरचे उत्पादन देखील स्थानिक पातळीवर सुरू होईल अशी माहिती आ.पाटील यांनी दिली.
या उपक्रमात सहभागी होण्यासाठी रोटरी क्लब उस्मानाबादचे अध्यक्ष सुधाकर भोसले, तुळजापूरचे अध्यक्ष सचिन शिंदे व नगरसेवक पंडित जगदाळे, कळंबचे अध्यक्ष हर्षद अंबुरे यांच्याशी संपर्क साधावा, असे आवाहन आमदार राणाजगजितसिंह पाटील यांनी केले आहे.
|
