कोरोनाविरोधातील लढाईसाठी पाठबळ आ. कैलास पाटील यांच्या निधीतून ५० लाख रुपये उस्मानाबाद/प्रतिनिधी - उस्मानाबाद व कळंब मतदारसंघातील आरोग्य यंत्रणेला कोरोनाविरोधातील लढाईसाठी पाठबळ देण्यासाठी मतदारसंघाचे शिवसेना आमदार कैलास पाटील यांनी ५० लाखांचा निधी उपलब्ध करुन दिला आहे. यातून मतदारसंघातील जिल्हा, उपजिल्हा रुग्णालय तसेच प्राथमिक आरोग्य केंद्रातील डॉक्टरांना पीपीई कीट घेणे, आयसीयू व्हेंटिलेटर, इन्फ्रा रेड थर्मामीटर, बीआयपीएपी मशीन, मास्क खरेदी होणार असून यानुसार जिल्हाधिकाऱ्यांनी तातडीने कारवाई करून पुढील खरेदी प्रक्रिया राबविण्याचे पत्रात नमूद केले आहे. पत्रकात म्हटले आहे की, कोरोनाचा प्रादुर्भाव रोखण्यासाठी या अगोदर मी मुख्यमंत्री सहाय्यता निधीसाठी महिन्याचे वेतन देऊ केले आहे. आता आमदार म्हणून मतदारसंघातील आरोग्य यंत्रणेला व आपत्कालीन परिस्थितीत जे डॉक्टर्स, नर्सेस इतर कर्मचारी सध्या काम करत आहेत. त्यांच्यासाठी आमदार निधीतून मदतीचा मी निर्णय घेतला आहे. जिल्हा रुग्णालय, स्त्री रुग्णालय, कळंब उपजिल्हा रुग्णालय, प्राथमिक आरोग्य केंद्र, उपकेंद्र अशा सर्वांना निधीच्या माध्यमातून सोयीसुविधा उपलब्ध करणार आहे. आमदार निधीतील ५० लाख रुपयांची तरतुद या कामासाठी केली आहे. कोरोनाचा प्रादुर्भाव झाल्यानंतर अतिदक्षता कक्षाची आवश्यकता भासते. कळंब येथे तशी सुविधा नसल्याने पुढील अडचणीची शक्यता ओळखुन अतिदक्षता कक्षासाठी १५ लाख रुपयांची तरतुद केली आहे. या शिवाय जिल्हा रुग्णालय, स्त्री रुग्णालय व कळंब येथील उपजिल्हा रुग्णालयातील डॉक्टर्स, नर्सेस इतर आरोग्य विभागातील कर्मचाऱ्यांसाठी पीपीई कीट उपलब्ध करणार आहे. तसेच जिल्हा रुग्णालय, स्त्री रुग्णालय व कळंबच्या उपजिल्हा रुग्णालयात कोरोनाचा प्रादुर्भाव रोखण्यासाठी बीआयपीएपी मशिन खरेदी करण्यात येणार आहे. उस्मानाबाद-कळंब मतदारसंघातील सर्व प्राथमिक आरोग्य उपकेंद्र व प्राथमिक आरोग्य केंद्रात इन्फ्रारेड थर्मामीटरर्सची सोय करण्यात येणार आहे. शिवाय या सर्व केंद्रांवरील डॉक्टर्स, नर्सेस व कर्मचाऱ्यांना पीपीई कीट उपलब्ध करुन देण्यात येणार आहे. मतदारसंघातील सर्व कोरोना सहाय्यता कक्षाच्या माध्यमातून सॅनिटायझर व मास्क वितरीत करण्यासाठीही निधी देण्यात आला आहे. या सर्व बाबींकरीता एकूण ५० लाखांचा निधी देण्यात आला असून यातून कोरोना विषाणुचा प्रादुर्भाव रोखण्यासाठी नियोजन करण्यात आले आहे. त्याप्रमाणे हा खर्च करण्यासाठी जिल्हाधिकाऱ्यांना पत्र दिलेले असून याबाबत तातडीने जिल्हा शल्यचिकित्सकांच्या माध्यमातून आवश्यक ती प्रक्रिया पूर्ण करून साहित्य खरेदी करण्यास सांगितले आहे.

उस्मानाबाद/प्रतिनिधी-
कोरोनाच्या पार्श्वभूमीवर केंद्र सरकारने २१ दिवसांचा लॉक डाऊन जाहीर केला असून या परिस्थितीत देशवासीयांना अन्नधान्य व पैशाची चिंता सतावू नये यासाठी पंतप्रधान नरेंद्र मोदी यांच्या मार्गदर्शनाखाली अर्थमंत्री निर्मला सीतारामण यांनी १ लाख ७० हजार कोटी रुपयांचे पॅकेज जाहीर केले. असेच आर्थिक सहाय्य राज्य शासनाने करावे, अशी अपेक्षा आमदार राणाजगजितसिंह पाटील यांनी व्यक्त केली आहे.
आमदार राणा पाटील यांनी दिलेल्या पत्रकात म्हटले आहे की, गोरगरीब, विधवा, दिव्यांग, शेतकरी, कामगार या वर्गाला केंद्रस्थानी मानून प्रधानमंत्री गरीब कल्याण योजना जाहीर करण्यात आली. लॉक डाऊन संकटाशी लढणाऱ्या डॉक्टर, पॅरामेडिकल स्टाफ, आशा वर्कर, स्वच्छता कर्मचारी यांच्यासाठी ५० लाख रुपयांचे विमा संरक्षण, देशातील ८० कोटी लोकांना दर माणसी ५ किलो तांदूळ किंवा गहू व एक किलो डाळ, मनरेगातून ५ कोटी कुटुंबांना २००० रुपये, शेतकरी सन्मान योजनेच्या माध्यमातून ८ कोटी ६९ लाख शेतकऱ्यांना एप्रिलच्या पहिल्या आठवड्यात प्रत्येकी २००० रुपये, पुढील तीन महिन्यांसाठी जनधन योजनेंतर्गत २० कोटी महिला खातेदारांना प्रति महिना ५०० रुपये, उज्ज्वला योजनेंतर्गत ८.३ कोटी बीपीएल कुटुंबीयांना पुढील तीन महिने तीन सिलिंडर मोफत देणे, अशा तरतुदी केंद्र सरकारने केल्या आहेत. त्याचप्रमाणे मनरेगा, गौण खनिज, असंघटीत बांधकाम कामगारांच्या योजना यासाठीचा निधी देखील राज्य सरकारने नागरिकांना दिलासा देण्यासाठी वापरावा असे निर्देश केंद्रीय अर्थमंत्री निर्मला सीतारामन यांनी राज्याला दिले आहेत. उत्तर प्रदेश, बिहार, केरळ या राज्यांनी तेथील नागरिकांसाठी विविध योजना जाहीर केल्या असून महाराष्ट्र सरकारने देखील राज्यातील जनतेला दिलासा देण्यासाठी स्वतंत्र मदत जाहीर करावी, अशी मागणी आमदार पाटील यांनी केली आहे.