उस्मानाबाद/प्रतिनिधी-एमआयटी -पुणे शिक्षणसंस्थासमुहाच्या एमआयटी स्कुल ऑफ गव्हर्नमेंट अंतर्गत महाराष्ट्र सरपंच संसद स्थापन करण्यात आली आहे.या संसदेच्या उस्मानाबाद जिल्हा समन्वयकपदी जिल्ह्यातील युवा नेते व सामाजिक कार्यकर्ते अनिल खोचरे यांची नियुक्ती करण्यात आली आहे.उस्मानाबाद जिल्ह्यातील भूम, कळंब, लोहारा, उस्मानाबाद, परांडा, तुळजापूर, उमरगा, वाशी या आठ तालुक्यात होणा-या सरपंच संसदेच्या कार्याचे ते समन्वयक असतील.अशी माहिती या संसदेचे प्रांत समन्वयक व्यंकटेश जोशी
यांनी दिली.
निवडपत्र व ओळखपत्र वितरण तसेच महाराष्ट्र सरपंच संसदे च्या विद्यमाने पुढील वर्षात आयोजित करावयाच्या विविध उपक्रमांविषयी विचारविनिमय करण्यासाठी बुधवार,दि.08 जानेवारी 2020 रोजी एमआयटी पुणे येथे विशेष कार्यक्रमाचे आयोजन करण्यात आले आहे. या कार्यक्रमात अनिल खोचरे यांच्या बरोबरच महाराष्ट्रातील उर्वरित सर्व जिल्हातील सरपंच संसदेच्या नवनियुक्त पदाधिका-यांना निवडपत्र व ओळ्खपत्रांचे वितरण होईल.
एमआयटी वल्र्ड पीस युनिव्हर्सिटी -पुणे चे कार्याध्यक्ष व एमआयटी स्कुल ऑफ गव्हर्नमेंटचे संस्थापक राहुल कराड त्यांच्या संकल्पनेतून महाराष्ट्र सरपंच संसद स्थापन झाली.
महाराष्ट्र राज्याच्या सर्वांगीण ग्रामविकास प्रक्रियेत पंचायतराज व्यवस्थेतील लोकनियुक्त लोकप्रतिनिधींची भूमिका मध्यवर्ती व सर्वात महत्वाची आहे. महाराष्ट्र राज्याच्या पंचायतराज व्यवस्थेतील सर्व लोकप्रतिनिधींचे अराजकीय स्वरूपात संघटन करणे,त्यांचे सर्वांगीण प्रबोधन करणे व विविध उपक्रमांचे अभ्यासपूर्वक संयोजन करून त्यांना प्रत्यक्ष ग्रामविकास प्रक्रियेत मौलिक सहकार्य करणे हे महाराष्ट्र सरपंच संसदे चे प्रमुख उद्दिष्ट्य आहे.
सामाजिक क्षेत्रात भरीव योगदान देत असलेल्या कार्यरत व्यक्तींचे नेटवर्क तयार करून त्यांच्या सहकार्याने हे ग्रामविकासाचे राज्यस्तरावरील महत्वपूर्ण अभियान यशस्वीरीत्या विस्तारित करण्याचे काम महाराष्ट्र सरपंच संसद करीत आहे.