भूम (प्रतिनिधी)- जिल्हा परिषद प्राथमिक शाळा सावरगाव (पा.) येथे शिक्षक दिन व श्रीकृष्ण जन्माष्टमी निमित्त दहीहंडी उत्सव उत्साहपूर्ण आणि आनंदी वातावरणात साजरा करण्यात आला. विद्यार्थ्यांच्या कलागुणांना वाव देण्याबरोबरच भारतीय संस्कृती, परंपरा आणि गुरू-शिष्य नात्याचे महत्त्व विद्यार्थ्यांना समजावे, या उद्देशाने विविध उपक्रमांचे आयोजन करण्यात आले.
कार्यक्रमाच्या प्रारंभी भारताचे माजी राष्ट्रपती, महान शिक्षणतज्ज्ञ व तत्त्वज्ञ डॉ. सर्वपल्ली राधाकृष्णन यांच्या जयंतीनिमित्त त्यांच्या प्रतिमेचे पूजन करून अभिवादन करण्यात आले. शिक्षक दिनाचे महत्त्व सांगताना शिक्षक हा विद्यार्थ्यांच्या जीवनाला योग्य दिशा देणारा, ज्ञानाबरोबरच संस्कारांची शिदोरी देणारा मार्गदर्शक असल्याचे उपस्थितांनी आपल्या मनोगतातून सांगितले.
यानंतर विद्यार्थ्यांनी श्रीकृष्ण जन्माष्टमी व दहीहंडी उत्सवात मोठ्या उत्साहाने सहभाग घेतला. श्रीकृष्णाच्या बाललीला, गोपाळकाला आणि दहीहंडीची परंपरा याविषयी विद्यार्थ्यांना माहिती देण्यात आली. विद्यार्थ्यांनी उत्स्फूर्तपणे सहभाग घेत वातावरणात आनंद आणि उत्साह निर्माण केला. ‘गोविंदा आला रे आला'च्या जल्लोषात दहीहंडी फोडण्यात आली. या उपक्रमातून विद्यार्थ्यांमध्ये संघभावना, सहकार्य, शिस्त, नेतृत्वगुण आणि आनंदी शिक्षणाची भावना विकसित करण्याचा प्रयत्न करण्यात आला.
कार्यक्रमात विद्यार्थ्यांनी शिक्षकांप्रती कृतज्ञता व्यक्त करत गुरूंचे जीवनातील महत्त्व, शिक्षकांविषयी आदर आणि शिक्षणाचे महत्त्व आपल्या भाषणातून व विविध सादरीकरणातून व्यक्त केले. त्यामुळे संपूर्ण शाळेचे वातावरण आनंदमय व उत्साहपूर्ण झाले. या कार्यक्रमाच्या आयोजनामागे विद्यार्थ्यांना केवळ पाठ्यपुस्तकी ज्ञान न देता सण, उत्सव, संस्कृती, संस्कार आणि सामूहिक सहभाग यांच्या माध्यमातून अनुभवाधारित शिक्षण मिळावे, हा शाळेचा शैक्षणिक दृष्टिकोन होता. अशा उपक्रमांमुळे विद्यार्थ्यांच्या व्यक्तिमत्त्व विकासाला चालना मिळते आणि शाळा ही विद्यार्थ्यांसाठी आनंदाचे व सर्जनशीलतेचे केंद्र बनते.
कार्यक्रमाच्या यशस्वी आयोजनासाठी शाळेतील मुख्याध्यापक श्री. माधव पोतरे सर, शिक्षिका श्रीमती पोतरे मॅडम, स्वयंसेवक श्रीम. कांबळे मॅडम, मदतनीस श्रीम. नभाताई महानवर अंगणवाडी सेविका श्रीम. कुलकर्णी मॅडम,शालेय कर्मचारी तसेच पालक व ग्रामस्थ यांनी सहकार्य केले. विद्यार्थ्यांनी कार्यक्रमात उत्स्फूर्त सहभाग नोंदवून शिक्षक दिन व दहीहंडी उत्सवाची सांगता आनंदमय वातावरणात केली. ‘शिक्षणातून संस्कार आणि संस्कारातून सक्षम व्यक्तिमत्त्व' या विचाराला अधोरेखित करणारा हा शिक्षक दिन व दहीहंडी उत्सव विद्यार्थ्यांसाठी अविस्मरणीय ठरला.