भुम (प्रतिनिधी)- पखरुड ता. भूम शिवारात अफूच्या शेतीवर वाशी पोलिसांनी मोठी कारवाई केली असून 58 किलो ओला अफू जप्त केला आहे. गुप्त माहितीच्या आधारे टाकलेल्या या छाप्यात सुमारे 8 लाख 77 हजार रुपये किमतीची अफूची झाडे जप्त करण्यात आली असून, याप्रकरणी तीन शेतकऱ्यांना ताब्यात घेण्यात आले आहे.
भुम तालुक्यातील पाखरुड शिवारात अशोक चव्हाण, राजेंद्र चव्हाण आणि धोंडिबा चव्हाण या तीन शेतकऱ्यांनी आपल्या शेतात अंमली पदार्थ असलेल्या अफूची बेकायदेशीर लागवड केल्याची खात्रीलायक माहिती पोलीस प्रशासनाला मिळाली होती. या माहितीची गांभीर्याने दखल घेत, पोलीस अधीक्षक श्रीमती रितू खोकर, अप्पर पोलीस अधीक्षक शफाकत आमना आणि उपविभागीय पोलीस अधिकारी (भूम) चोरमले यांच्या मार्गदर्शनाखाली पथक तयार करण्यात आले.
मोठ्या फौजफाट्यासह धाडसी कारवाई
पोलीस निरीक्षक शंकर शिंदे, सहाय्यक पोलीस निरीक्षक सावंत, घोडके, आणि पोलीस उपनिरीक्षक भाळे यांच्यासह अंमलदार बोरकर, मलंगनेर, लाटे, खैरे, खारगे, मिसाळ, कोरडे, आणि चौघुले यांच्या पथकाने ही कारवाई केली. या मोहिमेत पारदर्शकता राखण्यासाठी शासकीय पंच, कार्यकारी दंडाधिकारी, वजन मापे संचालक, व्हिडिओग्राफर आणि फॉरेन्सिक टीमलाही पाचारण करण्यात आले होते.
जप्त केलेला मुद्देमाल:
छाप्यादरम्यान अशोक चव्हाण (गट क्र. 8) यांच्या शेतातून 36 किलो अफूची झाडे किंमत 5,40,000/-)
राजेंद्र चव्हाण (गट क्र. 12): 18 किलो अफूची झाडे (किंमत 2,70,000/-)
धोंडिबा चव्हाण: 4.5 किलो अफूची झाडे (किंमत 67,000/-)
जागेवरच पंचनामा आणि अटकेची कारवाई
फॉरेन्सिक टीमच्या उपस्थितीत सर्व मालाचे वजन करून, व्हिडिओ चित्रीकरणासह कायदेशीर जप्तीची प्रक्रिया पूर्ण करण्यात आली. या तिन्ही आरोपींना पोलिसांनी ताब्यात घेतले असून, वाशी पोलीस ठाण्यात त्यांच्याविरुद्ध अंमली पदार्थ प्रतिबंधक कायद्यान्वये गुन्हा दाखल करण्याची प्रक्रिया सुरू आहे.