धाराशिव (प्रतिनिधी)- कुलस्वामिनी तुळजाभवानी मातेच्या कोट्यवधी भाविकांसाठी आपल्या महायुती सरकारने गोड बातमी दिली आहे. तुळजापूर तीर्थक्षेत्र विकास आराखड्यासाठी भूसंपादनाच्या कामासाठी 18 कोटी 89 लाख रुपयांचा निधी उपलब्ध करून देण्यात आला आहे. जिल्हाधिकारी तथा मंदिर समितीचे अध्यक्ष यांच्याकडे निधी वितरित करण्याबाबत शासन आदेश जारी करण्यात आला आहे. त्यामुळे तुळजापूर तीर्थक्षेत्र विकास आराखड्याच्या कामाचा प्रत्यक्ष श्रीगणेशा आता लवकरच होणार असल्याच्या विश्वास मंदिर समितीचे विश्वस्त तथा आमदार राणाजगजितसिंह पाटील यांनी व्यक्त केला आहे.
कुलस्वामिनी तुळजाभवानी मातेचे तीर्थक्षेत्र असलेल्या श्री क्षेत्र तुळजापूर विकास आराखड्यावर राज्य सरकारने यापूर्वीच मोहर उमटवलेली आहे. त्यासाठी 1,865 कोटी रुपयांचा निधीही मुख्यमंत्री देवेंद्र फडणवीस यांच्या नेतृत्वाखालील राज्य सरकारने मंजूर केला आहे. या विकास अनुषंगानेच नियोजन विभागाकडून भूसंपादन प्रक्रिया तातडीने राबविण्यासाठी मंदिर समितीचे अध्यक्ष तथा जिल्हाधिकारी यांच्याकडे निधी वितरित करण्याबाबत शासन आदेश निर्गमित करण्यात आला आहे. 18 कोटी 89 लाख रुपयांच्या निधीद्वारे चालू आर्थिक वर्षापासूनच भूसंपादन कामाची अंमलबजावणीही सुरू होणार असल्याची माहिती आमदार राणाजगजितसिंह पाटील यांनी दिली आहे. राज्य शासनाच्या नियोजन विभागाने शासन निर्णय जारी केला आहे. त्यामुळे तीर्थक्षेत्र विकास आराखड्याच्या कामाला आता गती मिळणार आहे.
हे होणार कामे
या आराखड्यांतर्गत मंदिर परिसराचा सर्वांगीण विकास साधला जाणार आहे. तीर्थक्षेत्र विकास आराखड्यामध्ये मुख्य दर्शन मंडप व तेथील अनुषंगिक सुविधा, श्री तुळजाभवानी माता छत्रपती शिवाजी महाराजांना तलवार देतानाचा 108 फुटाचा पुतळा, घाटशिळ, महामार्गाजवळील सोलापूर बायपास पट्टयामध्ये व हडको येथे भक्तनिवास, प्रसादालय,पुस्तकालय, भोजनालय, भाविक सुविधा केंद्र,वाहनतळ तयार करणे.वृंदावन गार्डनप्रमाणे आधुनिक उद्यान, वृध्द व दिव्यांगाकरिता लिफ्ट, ट्रॅव्हलेटर, 80 कोटींचा रामदरा तलाव सौंदर्यीकरण आदी बाबींचा अंतर्भाव करण्यात आला आहे.