धाराशिव (प्रतिनिधी)- पहिल्या पतीपासून झालेले मूल नकोसे असल्यामुळे त्या मुलाला दहा हजारात विकून आईनेच पलायन केल्याची धक्कादायक घटना उमरगा तालुक्यातील मुरूम येथे घडली आहे. एक वर्षाच्या त्या चिमुकल्याला चक्क बॉण्ड पेपरवर लिहून देत दहा हजार रुपयांना विकल्याचा संतापजनक प्रकार उघडकीस आल्यामुळे खळबळ उडाली आहे. चिमुकल्या मुलाच्या आज्जीने मुलगा आणि सून हरवल्याची तक्रार दिल्यामुळे हा प्रकार उघडकीस आला आहे.
या बाबत अधिक माहिती अशी की, मुरूम येथील एका महिलेने त्यांची सून आणि एक वर्षाचा लहान मुलगा हरवल्याची तक्रार दिली होती. ही घटना काही सामाजिक कार्यकर्त्यांना देखील समजली होती. त्यानंतर तक्रार देणाऱ्या आज्जीच्या मदतीने आई आणि मुलगा यांचा शोध घेतला असता, आईनेच छोट्या मुलाला सोलापूर येथे दहा हजार रुपयांना विकून दुसऱ्या नवऱ्यासोबत पलायन केले असल्याचे उघडकीस आले. विशेष म्हणजे बॉण्डवर लिहून देऊन एक वर्षाच्या चिमुकल्याची विक्री केल्याचे उघड झाले. यानंतर मुरूम येथील सामाजिक कार्यकर्त्यांनी आज्जीला सोबत घेऊन सोलापूर येथून विक्री केलेल्या लहान मुलाला ताब्यात घेतले. तसेच त्याला बाल कल्याण समितीकडे सुपूर्द करण्यात आले. मुलाची प्रकृती बिघडल्यामुळे त्याच्यावर धाराशिव येथील शासकीय वैद्यकीय महाविद्यालयाच्या रुग्णालयात उपचार सुरू करण्यात आले आहेत.
मुलाला खरेदी करणाऱ्या कुटुंबाने रुग्णालयात येऊन गोंधळ घालण्यास सुरुवात केली. मात्र, समाजिक कार्यकर्त्यांनी देखील मुलाच्या आज्जीच्या बाजूने उभे राहत मुलाला परत करण्यास विरोध केला. याप्रकरणी अजून कोणावरही गुन्हा दाखल करण्यात आला नाही.