तुळजापूर (प्रतिनिधी)- तुळजापूर शहरातील धाराशिव रोडवरील मलबा हाईटस परिसरातील एका फ्लॅटमध्ये सुरू असलेल्या ऑनलाइन मटका अड्डयावर पोलिसांनी शनिवारी दि. 16 मे रोजी रात्री छापा टाकुन रोख रकमेसह मोबाईल, लॅपटॉप, प्रिंटर असा एकूण 1 लाख 39 हजार रुपयांचा मुद्देमाल जप्त केला असून, 33 जणांविरुद्ध महाराष्ट्र जुगार प्रतिबंधक कायद्यान्वये गुन्हा दाखल करण्यात आला आहे. या घटनेने शहरात खळबळ उडाली आहे.
मलबा हाईटसमधील साठे नावाच्या व्यक्तीच्या फ्लॅटमध्ये कल्याण आणि मिलन मटक्याचे आकडे व्हॉट्सॲपद्वारे घेऊन ऑनलाइन जुगार खेळला जात असल्याची माहिती मिळाली होती. या माहितीच्या आधारे, पोलिसांनी शनिवारी रात्री दहा वाजता छापा टाकला. यावेळी चार इसम घटनास्थळी मटका खेळताना आणि खेळवताना रंगेहाथ सापडले. त्यांची नावे विक्रम दिलीप नाईकवाडी (वय 31, रा. दीपक चौक, तुळजापूर), विकास बाबुराव दिवटे (वय 30, रा.घाटशीळ रोड, तुळजापूर), रविंद्र बळीराम ढवळेरा शिवाजीनगर हडको, तुळजापूर) आणि निलेश आप्पासाहेब तेलंग (वय 29, रा. ढेकरी, ता. तुळजापूर) अशी आहेत.
मोठ्या रॅकेटचा पर्दाफाश
चौकशीदरम्यान, विक्रम नाईकवाडी याने आपण स्वतः, चैतन्य मोहनराव शिंदे (रा. शुक्रवार पेठ, तुळजापूर), अमोल माधवराव कुतवळ (रा. रावळ गल्ली, तुळजापूर), सचिन पाटील (रा.रावळ गल्ली, तुळजापूर) आणि विनोद विलास गंगणे (रा. जिजामाता नगर, तुळजापूर) हे या मटका बुकीचे मालक असल्याचे कबूल केले. तसेच, या रॅकेटमध्ये कमिशनवर काम करणारे अनेक एजंट असल्याचेही उघड झाले आहे. राम मांगडे, विजय निंबाळकर, ज्ञानेश्वर जाधव, संतोष जगताप, मोहन मोहरकर, कृष्णा काळे, मिथुन पोकळे, अजाज शेख, राम हरी मस्के, हसन नाईकवाडी, संतोष रोकडे, कुलदिप गरड, अक्षय खराडे, गाढवे सर, विंकी पोकळे, सुभाष पारवे, सागर शिंदे, शुभम क्षिरसागर, अंबादास राशीनकर, श्रावण जाधव आणि जिवन बोबडे यांचा एजंट म्हणून समावेश आहे. हे एजंट व्हॉट्सॲप ग्रुपद्वारे मटक्याचे आकडे आणि पैसे गोळा करत होते. वडाळा येथील फिरत्या एजंटपर्यंत पोहोचल्याचे तपासात निष्पन्न झाले आहे. अशपाक खलील मुलानी, गणेश बापुसाहेब देशमुख आणि तात्या कदम हे या फिरत्या एजंटमध्ये सामील असल्याचे समोर आले आहे.
या प्रकरणी तुळजापूर पोलिसांनी 33 जणांविरुद्ध महाराष्ट्र जुगार प्रतिबंधक अधिनियमाच्या कलम 4 आणि 5 अंतर्गत गुन्हा नोंदवला आहे. जप्त केलेल्या मुद्देमालात विविध कंपन्यांचे मोबाईल फोन, लॅपटॉप, प्रिंटर, कॅल्क्युलेटर, रोख रक्कम आणि मोठ्या प्रमाणात जुगाराच्या हिशोबाची नोंद असलेली रजिस्टर्स आणि कागदपत्रे यांचा समावेश आहे. या धडक कारवाईमुळे शहरातील अवैध धंदे चालवणाऱ्यांचे धाबे दणाणले आहेत.