उमरगा (प्रतिनिधी)- विद्यार्थ्यानी यश मिळविण्यासाठी सातत्याने परिश्रम करून प्रयत्नाची पराकाष्टा करावी कारण तुमच्या यशातच समाजाचा व देशाचा विकास दडला आहे. उच्च ध्येय बाळगून ध्येय प्राप्तीसाठी मेहनत, सातत्य, वेळेचे नियोजन, सकारात्मक विचार व दुरदृष्टी ठेवून मूल्ला सरांनी नोकरीच्या मागे न लागता उमरगा येथे सगणंक शिक्षणाची सोय करून हजारो विद्यार्थी घडविले. सोबतच या समाजाचे आपण काही देणे लागतो ही जाण ठेवणे गरजेचे असल्याचे प्रतिपादन रोटरी क्लबचे माजी प्रांतपाल डॉ. दिपक पोफळे यांनी व्यक्त केले.
मायक्रोकॉम कॉम्प्युटर एज्युकेशन या संस्थेच्या 25 व्या वर्धापन दिनानिमित्त आयोजित कार्यक्रमात प्रमुख पाहुणे म्हणून ते बोलत होते. या कार्यक्रमाच्या अध्यक्षस्थानी आदर्श महाविद्यालयाचे प्राचार्य डॉ. दिलीप गरूड होते. यावेळी संस्थेचे संचालक प्रा. युसुफ मुल्ला, कौन बनेगा करोडपती फेम मुकुंद मोरे, संजय बिराजदार यांची प्रमुख उपस्थिती होती. पुढे बोलताना डॉ. दिपक पोफळे म्हणाले की, स्वतःच्या यशात मशगूल न रहाता अनेक सामाजिक कार्यात सहभाग घेतला रोटरीच्या माध्यमातून त्यांनी वृक्ष लागवड, रक्तदान शिबिर, स्वच्छता अभियान, स्पर्धा परीक्षा मार्गदर्शन, गरीब व होतकरू विद्यार्थ्यांना शैक्षणीक मदत, करोना काळात शेकडो रुग्णांना अन्नदान अशा सामाजिक उपक्रमातून त्यांनी केलेलं कार्य उल्लेखनीय आहे. त्यांचा आदर्श डोळ्यापुढे ठेवून विद्यार्थ्यानी भावी आयुष्यात वाटचाल करावी असे आवाहन त्यांनी यावेळी केले.
कार्यक्रमाचे अध्यक्ष प्राचार्य डॉ दिलीप गरुड यांचेही भाषण झाले. कौन बनेगा करोडपतीच्या हॉटशिट पर्यंत जाऊन यश मिळविलेले जगदाळवाडी येथील शेतकरी मुकुंद मोरे व संजय बिराजदार यांची भाषणे झाली. यावेळी विविध स्पर्धेत यश संपादन केलेल्या विद्यार्थ्यांचा यावेळी सत्कार करण्यात आला. मायक्रोकॉम संस्थेच्या विद्यार्थ्यांना मान्यवरांच्या हस्ते शैक्षणिक साहीत्याचे वाटप करण्यात आले. पुजा माने यांनी सुत्रसंचलन केले. तर सुमय्या जमादार यांनी आभार मानले. यावेळी विद्यार्थी व पालक मोठ्या संख्येने उपस्थित होते.