कळंब (प्रतिनिधी)- मंदिराबरोबरच ज्ञानमंदिर देखील उभा करण्याची गरज असून आमदार कैलास पाटील यांनी प्रत्येक गावात अभ्यासिका उभारण्याचा संकल्प केला आहे. धाराशिव - कळंब मतदारसंघातील महाविकास आघाडीचे उमेदवार आणि विद्यमान आमदार कैलास पाटील यांनी आगामी निवडणुकीच्या प्रचारात विद्यार्थ्यांसाठी मोठे आश्वासन दिले आहे. कळंब तालुक्यातील पिंपरी येथे आयोजित सभेत ते बोलत होते.
प्रत्येक गावात अभ्यासिका उभारली जाईल, ज्यामुळे विद्यार्थ्यांना बाहेर जाऊन अभ्यास करण्याची गरज भासणार नाही. आ. पाटील यांनी आपल्या भाषणात सांगितले की, विद्यार्थ्यांसाठी योग्य ठिकाणी अभ्यासिका निर्माण करणे आवश्यक आहे. अनेक पालकांना आपल्या मुलींना अभ्यासासाठी बाहेर पाठवायचे नसते, परंतु त्यांच्याकडे योग्य सुविधा उपलब्ध नाहीत. त्यामुळे मी संकल्प केले आहे की प्रत्येक गावात अभ्यासिका तयार केली जाईल, जेणेकरून विद्यार्थ्यांना शिक्षणासाठी कुठेही बाहेर जावे लागणार नाही.
या उपक्रमाद्वारे आ. पाटील यांचे उद्दिष्ट आहे की, विद्यार्थ्यांना त्यांच्या गावातच गुणवत्तापूर्ण अभ्यासाच्या सुविधा उपलब्ध करून द्याव्यात. त्यामुळे विद्यार्थ्यांना अभ्यासासाठी दूर प्रवास करावा लागणार नाही आणि पालकांचीही चिंता कमी होईल.
आ. पाटील यांनी पश्चिम महाराष्ट्रातील गावांचे उदाहरण देत सांगितले की, पश्चिम महाराष्ट्रात प्रत्येक गावात आवश्यक त्या सुविधा आहेत. त्या सुविधांचे अनुकरण आपल्या गावांमध्ये करून आपणही गावाच्या विकासाला चालना देऊ शकतो.पाटील यांच्या मते, शिक्षणाच्या मूलभूत सुविधांची उभारणी केल्यास आपल्या मतदारसंघातील मुलांना अधिक चांगल्या संधी मिळतील, ज्यामुळे त्यांना उत्तम शिक्षण घेण्यास प्रोत्साहन मिळेल.
विद्यार्थ्यांच्या शिक्षणाच्या बाबतीत आ. पाटील यांचा विचार अधिक पुढे जातो. त्यांनी मत व्यक्त केले की, आपल्या नवीन पिढीने जुन्या पिढीसारखेच कष्ट करून यश मिळवले पाहिजे. पण त्यासाठी त्यांना योग्य सुविधा देणे आपले कर्तव्य आहे.त्यामुळे पुढील पिढीला प्रोत्साहन देण्यासाठी आणि त्यांच्या भवितव्यासाठी अभ्यासिका आणि अभ्यास केंद्रांची निर्मिती अत्यंत आवश्यक असल्याचे त्यांनी नमूद केले.