धाराशिव (प्रतिनिधी)-बारा बलुतेदारांसाठी श्री संत गाडगेबाबा आर्थिक मागास विकास महामंडळ स्थापन केले जाईल, असे सांगून मुख्यमंत्री ना.एकनाथ संभाजी शिंदे यांनी ओबीसी समाजाच्या आरक्षणाला धक्का न लागू देता मराठा समाजाला आरक्षण दिले जाईल, अशी ग्वाही त्यांनी दिली. राज्यातील बारा बलुतेदार समाज संघटनांच्या शिष्टमंडळाने मुख्यमंत्र्यांची मुंबई येथील सह्याद्री अतिथीगृहात सोमवारी भेट घेतली, त्यावेळी ते बोलत होते. यावेळी मुख्यमंत्री ना.शिंदे यांचा बारा बलुतेदार संघटनांच्या वतीने सत्कार करण्यात आला.
मुख्यमंत्र्यांनी सांगितले की, प्रतापगड येथे शूरवीर जिवाजी महाले स्मारकासाठी जागा देण्यात येईल. बारा बलुतेदार समाजासाठी विश्वकर्मा कौशल्य प्रशिक्षण योजना म्हणून कौशल्य विकास विभागाच्या माध्यमातून स्वतंत्र व्यवस्था केली जाईल. तेर (ता.धाराशिव) येथील संत गोरोबा काका समाधीस्थळास ‘अ' वर्ग पर्यटन स्थळाचा दर्जा देण्याबरोबरच ऋणमोचन येथील संत गाडगेबाबा कर्मभूमी स्मारकाच्या तसेच पंढरपुरातील नामदेव महाराज समाधीस्थळ विकासाला गती देण्याचेही मुख्यमंत्र्यांनी शिष्टमंडळाला आश्वासित केले. यावेळी माजी आमदार बळीराम शिरास्कर, प्रदेश अध्यक्ष कल्याण दळे, बारा बलुतेदार महासंघाचे प्रदेश उपाध्यक्ष धनंजय शिंगाडे, मराठा व ओ.बी.सी समन्वयक योगेश केदार, प्रतापराव गुरव, लक्ष्मण तात्या वडीले तसेच बारा बलुतेदार महासंघाचे राज्यातील प्रमुख पदाधिकारी उपस्थित होते.