.jpg)
तुळजापूर (प्रतिनिधी)- महाराष्ट्राची कुलस्वामिनी श्री तुळजाभवानी देवीचे प्राचीन दागदागिने तपासणी करण्यासाठी गठीत केलेल्या समिती ने सादर केलेल्या अहवालात प्राचीन दुर्मिळ दागदागिन्यांमधील काही प्राचीन अलंकार गायब झालेले असल्याचे नमूद केले आहे. काही अलंकाराच्या वजनात तफावत असल्याचा अहवालात निर्दशनास आल्याने खळबळ उडाली आहे. आता या प्रकरणी मंदिर समिती कुणा विरोधात गुन्हे दाखल करणार याची उत्सुकता तमाम देविभक्तांना लागली आहे. यात श्री तुळजाभवानी मातेचा सुमारे एक किलो वजनाचा प्राचीन सोन्याचा मुकुट गायब असल्याचे समोर आले आहे. या संदर्भात तुळजाभवानी मंदिर समितीचे अध्यक्ष तथा जिल्हाधिकारी डॉ. सचिन ओम्बासे यांनी पाच दिवसात या संदर्भातला जबाबदारी निश्चित करण्याचा अहवाल आल्यानंतर संबंधितांविरोधात फौजदारी गुन्हे दाखल करू असे पत्रकारांशी बोलताना सांगितले.
त्याचबरोबर तुळजाभवानी देवीच्या खजिन्यात असलेल्या शेकडो वर्षे जन्या दुर्मिळ दागिन्यांच्या वजनात कमालीची तफावत आढळून आली आहे. तुळजाभवानी देवीच्या नित्योपचारासाठी वापरण्यात येणारे सोन्या-चांदीची दागिने, हिरे, मोती, माणिक, पाचू असे अनेक अलंकार मंदिराच्या तिजोरीतून गायब असल्याचेही उपडकीस आले आहे. तुळजाभवानी मंदिरातील प्राचीन दागदागिन्यांची तपासणी करण्यासाठी 16 सदस्यांची समिती गठीत करण्यात आली होती. या समितीने दोन महिन्यांपूर्वी अहवाल सादर केला आहे. त्यातून ही खळबळजनक माहिती समोर आली आहे. तुळजाभवानी मंदिर संस्थानचे अध्यक्ष तथा जिल्हाधिकारी डॉ. सचिन ओम्बासे यांनी तुळजाभवानी देवीच्या तिजोरीतील सोने-चांदी आणि प्राचीन अलंकाराची तपासणी करण्यासाठी 16 सदस्यांची समिती गठीत केली होती. उमरगा येथील उपविभागीय अधिकारी गणेश पवार यांच्या अध्यक्षतेखालील या समितीने मंदिर प्रशासनातील अधिकारी, पुजारी मंडळाचे प्रतिनिधी आणि महंतांचा सहभाग होता. तुळजाभवानी देवीचे मौल्यवान दुर्मीळ दागिने एकूण सात डब्यात ठेवण्यात आलेले आहेत. हे दागिने 300 ते 900 वर्षे जुने आहे. डबा क्र. 1 हा विशेषप्रसंगी वापरला जातो. शारदीय व शाकंभरी नवरात्रोत्सव, रथसप्तमी महालक्ष्मी गुढीपाडवा अक्षय तृतीया, मकर संक्रांत, शिवजयंती अशा महत्त्वाच्या दिवशी याडब्यातील दागदागिन्यांचा साज तुळजाभवानी देवीला केला जातो.
या डब्यात एकूण 27 प्राचीन अलंकार आहेत. त्यापैकी चार अलंकार गायब आहे. डबाक्र. 6 मधील अलंकार नित्योपचारासाठी 1976 वापरले जातात. पर्यंत डबा क्र. 3 मधील अलंकार नित्योपचार पूजेसाठी वापरले जात होते. मात्र दागिन्यांची सतत दुरुस्ती करावी लागत असल्याने डबा क्र. 3 बंद करून डबा क्र.6 हा 1976 पासून नित्योपचारासाठी वापरला जात आहे. त्यातील साखळीसह 12 पदराच्या 11 पुतळ्या असलेले मंगळसूत्र व चांदीचा खडाव हे अलंकार गहाळ झाले आहेत. या डब्यात असलेल्या 21 अलंकारांपैकी अनेक अलंकाराच्या वजनात तफावत आहे. पुरातन खडे बाजूला काढून त्या ठिकाणी साधे खडे ठेवण्यात आले आहेत. 1976 पर्यंत नित्योपचारासाठी वापरण्यात आलेल्या डबा क्र. 3 मध्ये 826 ग्रॅम वजनाचा सोन्याचा मूळ मुकुट गहाळ असल्याचा संशय समितीने व्यक्त केला आहे. तुळजाभवानी देवीच्या जुन्या फोटोमध्ये असलेला मुकुट आणि डबा क्र. 3 मध्ये सध्या आढळून आलेला मुकुट यात फरक आहे. त्यामुळे तुळजाभवानी देवांचा सोन्याचा प्राचीन मुकुट बदलून त्या ठिकाणी दुसरा मुकुट ठेवला असल्याची नोंद समितीने त्यांच्या अहवालात केली आहे. त्याचबरोबर या डब्यातील एकूण 16 अलंकारांपैकी मंगळसूत्र, नेत्रजडावी, माणिकमोती हे तीन दुर्मीळ आणि मौल्यवान अलंकार गहाळ झाले आहेत. एक किलो 268 ग्रॅम वजनाची 289 सोन्याच्या पुतळ्याची तीन पदरी शिवकालीन माळ मात्र तत्काळ दुरूस्त करण्याची शिफारस समितीने केली आहे. डबा क्र. 5 मधील एकूण 10 अलंकारांपैकी एक अलंकार गायब तर अन्य अलंकाराच्या वजनातही तफावत आहे. तर डबा क्र. 7 मधील एकूण 32 दुर्मीळ अलंकारांपैकी तुळजाभवानी देवीचा पुरातन मुकुट गायब असल्याचे आढळून आले आहे. तर अन्य 31 अलंकारांच्या वजनातही लक्षवेधी तफानत असल्याचे समितीने अहवालात नमूद केले आहे. या प्रकरणी मुख्यमंत्री, विधी व न्याय विभाग, धर्मादाय आयुक्त यांच्याकडे सातत्याने पाठपुरावा करूनही दोषींवर अद्याप कारवाई करण्यात आलेली नाही. या प्रकरणाचा पाठपुरावा श्रीतुळजाभवानी पुजारी मंडळाचे माजी अध्यक्ष किशोर गंगणे यांनी केला होता.