पंतप्रधान पीक विमा योजनेतील वैयक्तिक शेतकऱ्यांनी विमा पोर्टलवर नुकसान झाल्याची तक्रार नोंदवण्याची जाचक अट रद्द करण्याची मागणी खासदार ओमप्रकाश राजेनिंबाळकर यांनी पंतप्रधान नरेंद्र मोदी यांच्याकडे केली आहे.
पंतप्रधान व कृषिमंत्र्यांना पाठवलेल्या निवेदनात म्हटले आहे की, उस्मानाबाद जिल्ह्यासह, औसा, निलंगा, बार्शी तालुक्यात ऑक्टोबर महिन्यात झालेल्या मुसळधार पावसामुळे अनेक शेतकऱ्यांच्या पिकांचे नुकसान झाले. यावर्षी या जिल्ह्यातील लाखो शेतकऱ्यांनी पंतप्रधान पीक विमा योजनेचा हप्ता भरला. काळात या जिल्ह्यात मुसळधार पावसामुळे लाखो हेक्टरवरील क्षेत्र पाण्यात वाहून गेले. या अतिवृष्टीमुळे ग्रामीण भागातील वीजेची व्यवस्था कोलमडली. वीज नसल्याने स्मार्टफोन व इंटरनेट सुविधा बंद पडल्यामुळे लाखो शेतकरी ऑनलाइन तक्रारी विमा पोर्टलवर नोंदवू शकले नाहीत. ही अट पंतप्रधान विमा योजनेत शेतकऱ्यांवर जाचक व अन्याय करणारी असून या अटीमुळे लाखो शेतकरी पीक विमा मिळण्यापासून वंचित राहिले आहेत. जिल्हाधिकाऱ्यांनी त्यांच्या यंत्रणेमार्फत सादर केलेले अहवाल स्वीकारून झालेल्या नुकसानीची व विम्याची भरपाई शेतकऱ्यांना मिळणे आवश्यक आहे. यामुळे शेतकऱ्यांनी विमा पोर्टलवर नुकसानीची माहिती देण्याची अट रद्द करावी, खासदार राजेनिंबाळकर यांनी निवेदनात म्हटले आहे.