उस्मानाबाद/ प्रतिनिधी
राज्य शासनाच्या माहिती व जनसंपर्क महासंचालनालयातर्फे शासनाच्या योजनांची माहिती सर्व सामान्य लोकांपर्यत पोहचविण्यासाठी यापूर्वीच्या लोककला आणि पथनाटय सादर करणाऱ्या संस्थाच्या जिल्हानिहाय निवडसूचीची मुदत 20 डिसेंबर 2020 रोजी संपली आहे. आता नवीन निवडसूची तयार करण्यासाठी त्या त्या जिल्हयातील संबंधित संस्थांकडून अर्ज मागविण्यात येत आहेत. संबंधित संस्थांना 1 जानेवारी 2021 पासून अर्ज करता येतील तर अर्ज करण्याची अंतीम मुदत 21 जानेवारी 2021 अशी आहे.संबंधित संस्थांनी येथील मध्यवर्ती प्रशासकीय इमारतीतील जिल्हा माहिती कार्यालयात मुदतीत अर्ज करावेत, असे आवाहन जिल्हा माहिती अधिकारी यशवंत भंडारे यांनी आज येथे केले आहे.
उस्मानाबाद जिल्हयातील लोककला/पथनाटयव्दारे माहिती देणाऱ्या उदाहरणार्थ गण गवळण,अभंग, पोवाडे, वगनाटय, बहुरूपी,भारूड आदी लोककला/पथनाटय पथकांची निवडसूची तयार करण्यात येत आहे.याबाबत या क्षेत्रातील अनुभवी संस्थाकडून अर्ज मागविण्यात येत आहेत.अर्ज करणाऱ्या लोककला संस्था आणि पथकला संस्थांकडे विविध विषयावर (शासकीय योजनासह ) कार्यक्रम, पथनाटय करण्याचा अनुभव असावा, पथक किमान दहा जणांचे असावे.यामध्ये स्त्री-पुरूष, वादक यांचा समावेश असाव,लोककला/पथनाटय पथक ज्या जिल्हयातील असेल त्याच जिल्हयातून अर्ज दाखल करावा,केंद्र सरकारच्या गीत आणि नाटय विभागाकडे संस्था नोंदणीकृत असल्यास प्राधान्य दिले जाईल,संस्थेकडे स्वत:ची ध्वनीक्षेपण यंत्रणा असणे अपेक्षित आहे.
इच्छुक संस्थांनी येथील जिल्हा माहिती कार्यालयाशी संपर्क साधून अर्जाचा नमुना आणि माहिती पत्रक प्राप्त करून घ्यावे.अर्जाचा नमुना तसेच माहिती पत्रक www.maharashtra.gov.in आणि dgipr.maharashtra.gov.in या वेबसाईटवरही उपलब्ध आहे.विहित नमुन्यातील अर्ज भरून जिल्हा माहिती अधिकारी यांना दि.1 जानेवारी 2021 ते 21 जानेवारी 2021 पर्यंत मिळतील अशा बेताने पाठवावेत.