धाराशिव (प्रतिनिधी)- रात्रीच्या गस्तीच्यावेळी जात असताना धाराशिव पोलिस दलाच्या वाहनाला एका भरधाव ट्रकने जोरदार धडक दिल्याने झालेल्या भीषण अपघातात एका सहायक पोलिस उपनिरीक्षकाचा जागीच मृत्यू झाला. तर वाहनातील अन्य पोलिस कर्मचारी जखमी झाले आहेत. ही घटना चोराखळी-येरमाळा दरम्यान घडली. श्रीराम कांबळे असे मृत् सहायक पोलिस उपनिरीक्षकांचे नाव आहे.
मिळालेल्या माहितीनूसर धाराशिव पोलिस मुख्यालयातील पोलिस कर्मचारी बुधवारी रात्रीच्या वेळी गस्त घालण्यासाठी आपल्या पोलिस व्हॅनमधून निघाले होते. चोराखळी आणि येरमाळा दरम्यानच्या मार्गावर असताना एका भरधाव वेगात येणाऱ्या ट्रकने पोलिस व्हॅनला मागून जोराची धडक दिली. ही धडक इतकी भीषण होती की पोलिस व्हॅनचा यात चुराडा झाला. या अपघातात व्हॅनमध्ये असलेले सहायक पोलिस उपनिरीक्षक श्रीराम कांबळे हे गंभीररित्या जखमी झाले आणि त्यांचा जागीच मृत्यू झाला. वाहनात असलेले इतर पोलिस कर्मचारी देखील या अपघातात जखमी झाले असून, त्यांना तातडीने जवळच्या रूग्णालयात उपचारासाठी दाखल करण्यात आले आहे.
घटनेची माहिती मिळताच पोलिस दलातील वरिष्ठ अधिकारी आणि कर्मचाऱ्यांनी तातडीने घटनास्थळी धाव घेतली. जखमी पोलिसांवर उपचार सुरू असून, या प्रकरणी अधिक तपास केला जात आहे. कर्तव्यावर असताना पोलिस अधिकाऱ्याचा अपघाती मृत्यू झाल्याने धाराशिव पोलिस दलावर शोककळा पसरली आहे.